২০২৫ বৰ্ষটো সংবাদ জগতৰ বাবে অত্যন্ত শোকাৱহ আৰু ভয়াৱহ বুলি প্ৰমাণিত হৈছে। আন্তঃৰাষ্ট্ৰীয় ফেডাৰেচন অৱ জাৰ্নালিষ্টছ (IFJ)-এ প্ৰকাশ কৰা তেওঁলোকৰ বাৰ্ষিক প্ৰতিবেদন অনুসৰি, যোৱা এটা বছৰত বিশ্বৰ বিভিন্ন প্ৰান্তত ১২৮ জন সাংবাদিক আৰু সংবাদকৰ্মীয়ে কৰ্তব্য পালন কৰিবলৈ গৈ প্ৰাণ হেৰুৱাইছে। ৩১ ডিচেম্বৰত প্ৰকাশিত এই প্ৰতিবেদনখনে সাংবাদিকৰ নিৰাপত্তাক লৈ বিশ্বজুৰি পুনৰবাৰ প্ৰশ্ন উত্থাপন কৰিছে।
প্ৰতিবেদনখনৰ তথ্য অনুসৰি, মধ্যপ্ৰাচ্য আৰু আৰৱ দেশসমূহ সাংবাদিকৰ বাবে আটাইতকৈ বিপজ্জনক অঞ্চল হিচাপে পৰিগণিত হৈছে। ইয়াৰে কেৱল পেলেষ্টাইনৰ গাজা অঞ্চলতে ৫৬ জন সাংবাদিকে যুদ্ধৰ বাতৰি সংগ্ৰহ কৰিবলৈ গৈ মৃত্যুৰ মুখত পৰিছে। ইয়াৰ পিছতে ১৩ জন সাংবাদিকৰ মৃত্যুৰে য়েমেন দ্বিতীয় স্থানত আছে। আনহাতে, যুদ্ধজৰ্জৰ ইউক্ৰেইনত ৮ জন আৰু ছুদানত ৬ জন সাংবাদিকে মৃত্যুক সাৱটি লৈছে।
ভাৰতবৰ্ষতো সাংবাদিকৰ নিৰাপত্তা আশাব্যঞ্জক নহয়। ২০২৫ চনত দেশৰ ৪ জন সাংবাদিকে সংবাদ সংগ্ৰহৰ সময়ত প্ৰাণ হেৰুৱাইছে। চুবুৰীয়া দেশ পাকিস্তানত ৩ জন আৰু বাংলাদেশত ২ জন সংবাদকৰ্মীৰ মৃত্যুৰ তথ্য প্ৰতিবেদনত উল্লেখ কৰা হৈছে।
কেৱল আন্তঃৰাষ্ট্ৰীয় ফেডাৰেচন অৱ জাৰ্নালিষ্টছ -এ নহয়, সাংবাদিকৰ নিৰাপত্তাৰ হকে কাম কৰা অন্যান্য সংস্থাসমূহেও অনুৰূপ তথ্য দাঙি ধৰিছে। ‘কমিটি টু প্ৰটেক্ট জাৰ্নালিষ্টছ’ (CPJ)-ৰ মতে এই সংখ্যা ১২৬ জন। প্ৰতিটো সংস্থাৰ তথ্যত সংখ্যাৰ সামান্য তাৰতম্য থাকিলেও, সকলোৱে একমুখে স্বীকাৰ কৰিছে যে সংবাদকৰ্মীৰ বাবে পৰিৱেশ অধিক প্ৰত্যাহ্বানমূলক হৈ পৰিছে।
প্ৰতিবেদনৰ আটাইতকৈ উদ্বেগজনক দিশটো হ’ল হত্যাকাৰীৰ সাৰি যোৱাৰ প্ৰৱণতা। তথ্য অনুসৰি, প্ৰতি ৯ জন নিহত সাংবাদিকৰ বিপৰীতে ৮ জনৰে হত্যাকাৰীক এতিয়ালৈকে কোনো শাস্তি প্ৰদান কৰা হোৱা নাই। কৰ্তব্যৰত অৱস্থাত লক্ষ্য কৰি কৰা আক্ৰমণ আৰু যুদ্ধক্ষেত্ৰৰ বিপদে সাংবাদিকসকলৰ কামত চৰম বাধাৰ সৃষ্টি কৰিছে।
সংবাদ মাধ্যমৰ স্বাধীনতা আৰু সাংবাদিকৰ সুৰক্ষা নিশ্চিত কৰিবলৈ আন্তঃৰাষ্ট্ৰীয় সম্প্ৰদায়ক কঠোৰ পদক্ষেপ গ্ৰহণ কৰিবলৈ বিশ্বৰ বিভিন্ন সাংবাদিক সংগঠনে আহ্বান জনাইছে।
