এইবাৰ আই পি এলৰ মেগা নিলামত অংশগ্ৰহণ কৰাসকলৰ ভিতৰত অন্যতম আছিল বৈভৱ সূৰ্য্যবংশী। তালিকাত বৈভৱৰ নাম ওলোৱাৰ পৰাই তেওঁক লৈ ব্যাপক চৰ্চা আৰম্ভ হৈছিল।
কাৰণ তেওঁৰ বয়স মাত্ৰ ১৩ বছৰ। তাতে কি হ’ল? আচল কথাটো হ’ল প্ৰদৰ্শন আৰু বেটিং দক্ষতা। আৰু তাতেই তেওঁ সকলোকে স্তম্ভিত কৰিলে। নিলামত ১৩ বছৰীয়া বৈভৱক লৈ কেনে প্ৰতিক্ৰিয়া হয় তাক চাবলৈ সকলোৱে উন্মুখ হৈ পৰিছিল।
কিন্তু এই বয়সত বাওঁহতীয়া বেটছমেনগৰাকীৰ যোৱা জানুৱাৰীত বিহাৰৰ হৈ প্ৰথম শ্ৰেণীৰ ক্ৰিকেটত অভিষেক ঘটিছিল। ভাৰত আৰু অষ্ট্ৰেলিয়াৰ মাজত ১৯ বছৰ অনুৰ্ধ যুৱ টেষ্ট শৃংখলাৰ পিছত সূৰ্যবংশীৰ জনপ্ৰিয়তা যথেষ্ট বৃদ্ধি পায়।
ছেপ্টেম্বৰ-অক্টোবৰ মাহত অনুষ্ঠিত এই শৃংখলাৰ প্ৰথমখন টেষ্টত তেওঁ শতক অৰ্জন কৰি প্ৰমাণ কৰিলে যে কম বয়স সত্ত্বেও তেওঁ ডাঙৰ প্লেটফৰ্ম কঁপাবলৈ সাজু। আনহাতে, বিহাৰৰ এইগৰাকী বেটছমেনে সৰ্বোচ্চ ৪১ ৰানৰ ইনিংছো খেলিছিল। কিন্তু আই পি এল ফ্ৰেঞ্চাইজিসমূহে কেৱল পৰিসংখ্যাতকৈ প্ৰতিভাৰ ওপৰত বিনিয়োগ কৰিবলৈ অধিক আগ্ৰহী, যিটো পূৰ্বে প্ৰমাণিত হৈছে।
আনহাতে, এই মাহতে আৰম্ভ হ’বলৈ গৈ আছে ১৯ বছৰ অনুৰ্ধ এছিয়া কাপ। সেই এছিয়া কাপতো ভাৰতীয় দলৰ এজন গুৰুত্বপূৰ্ণ সদস্য বৈভৱ। ৩০ নৱেম্বৰত পাকিস্তানৰ বিৰুদ্ধে প্ৰথমখন খেল খেলিব ভাৰতীয় যুৱ দলটোৱে। তাত বৈভৱৰ ওপৰত অধিক দৃষ্টি থাকিব।
কাৰণ, নিলামত তেওঁ কোটি টকাৰ দাম পাইছে। তেওঁক ৰাজস্থান ৰয়েলছে ১.১০ কোটি টকাত কিনিছে। তাতোকৈ ডাঙৰ কথাটো হ’ল ৰাহুল দ্ৰাবিড় যিটো দলৰ সৈতে জড়িত সেই দলটোত প্ৰতিভাৰ উন্মেষণ ঘটিবই!
