উত্তৰ-পূৰ্বাঞ্চলৰ বিশেষ আন্তঃগাঁঠনি বিকাশ আঁচনিৰ (নৰ্থ-ইষ্ট স্পেচিয়েল ইনফ্ৰাস্ট্ৰাকছাৰ ডেভেলপমেন্ট স্কীম) অধীনত কেন্দ্ৰই অলপতে ৫,৩০০কোটি টকা মুকলি কৰা বিষয়ত অনুমোদন জনাইছে।
এই ধনখিনিৰ (৫,৩০০ কোটি টকা) অধিক অংশই নন-লেপচেবল চেন্ট্ৰেল পুল ৰিছোৰ্চেজ (এনএলচিপিআৰ) প্ৰকল্পৰ অধীনত এতিয়ালৈকে সমাপ্ত নোহোৱা ৩৭,০০ কোটি টকাৰ প্ৰকল্পসমূহ সমাপ্ত কৰাত ব্যবহাৰ কৰা হ’ব আৰু প্ৰায় ১,৬০০ কোটি টকাৰে এনইএছআইডিএছ আঁচনিৰ অধীনত সম্পূৰ্ণ নতুন প্ৰকল্পৰ কাম আৰম্ভ কৰা হ’ব।
সদনত শেহতীয়াভাৱে এই কথা সদৰি কৰি ড’নাৰ মন্ত্ৰী ড০ জিতেন্দ্ৰ সিঙে কয়, ‘মুঠ ৫,৩০০ কোটি টকা ব্যয়সাপেক্ষ উত্তৰ-পূব বিশেষ আন্তঃগাঁঠনি বিকাশ আঁচনি (নৰ্থ-ইষ্ট স্পেচিয়েল ইনফ্ৰাস্ট্ৰাকশ্বাৰ ডেভেলপমেন্ট স্কীম) নামৰ এখন সম্পূৰ্ণ নতুন আঁচনি বাস্তৱায়িত কৰাৰ ক্ষেত্ৰত কেন্দ্ৰীয় চৰকাৰে অনুমোদন জনাইছে।’
কেন্দ্ৰীয় চৰকাৰৰ তৰফৰ পৰা কোৱা হৈছে যে ৰেহাইপ্ৰাপ্ত নোহোৱা (নন একজেম্ট) সকলো ইউনিয়ন মন্ত্ৰ্যালয়েই তেওঁলোকৰ বাজেটৰ বাবে আবণ্টন কৰা মুঠ ধনৰাশিৰ (গ্ৰ’ছ বাজেটাৰী এল’কেশ্যন) ১০শতংশ প্ৰতি বছৰে উত্তৰ-পূৰ্বাঞ্চলৰ বিকাশৰ বাবে বাধ্যতামূলকভাৱে আচুতীয়াকৈ ধৰি থ’ব লাগিব।
বৰ্তমানৰ এইখন এনএলচিপিআৰ আঁচনিৰ অধীনত যোৱা বছৰৰ ছেপ্টেম্বৰলৈকে সমাপ্ত নোহোৱা বিভিন্ন খণ্ডৰ ১৬১৪টা প্ৰকল্পক ধন যোগান ধৰাৰ বাবে বাচনি কৰি লোৱা হৈছে আৰু তাৰে ৯৭২টাৰ কাম ইতিমধ্যে সমাপ্ত হৈছে।
কৃষি আৰু ইয়াৰ সহযোগী খণ্ডসমূহৰ অন্তৰ্গত ০৫টা প্ৰকল্পৰ কাম ইতিমধ্যে সমাপ্ত হৈছে। শিক্ষা খণ্ডত ৯৪টা প্ৰকল্পৰ আৰু পানী যোগান আৰু বান নিয়ন্ত্ৰণ খণ্ডত ১৬২ প্ৰকল্পৰ কাম সমাপ্ত হৈছে। স্বাস্থ্য খণ্ডত ৩৫টা প্ৰকল্প সমাপ্ত হৈছে। বিভিন্ন খণ্ডৰ প্ৰায় ৬০টা প্ৰকল্পৰ কাম সমাপ্ত হৈছে। শক্তি খণ্ডত ১৭৫টা, পথ আৰু দলং নিৰ্মাণ খণ্ডৰ ৩২টা প্ৰকল্প সমাপ্ত হৈছে। ক্ৰীড়া খণ্ডত ১৭টা আৰু পানী যোগানৰ ৯২টা প্ৰকল্পৰ কাম ইতিধ্যে সমাপ্ত হৈছে।
চলিত ২০১৭-১৮ বৰ্ষত কাম চলি থকা ‘এএলচিপিআৰ আঁচনিৰ অধীনৰ প্ৰকল্পসমূহকে ধৰি ২,১৭২.২৫ কোটি আৰু ৮২.১৩ টকা অৰুণাচলৰ বাবে অনুমোদন কৰা হৈছে। অসমৰ বাবে ১২,০৩৫.৬২ কোটি আৰু ১৯৯.৫২ কোটি টকা মোকোলাই দিয়া হৈছে।
মণিপুৰৰ বাবে ৩,৯১ কোটি আৰু ১২ কোটি টকা মোকোলাই দিয়া হৈছে। মেঘালয়ৰ বাবে ৩,১২০.১১ কোটি আৰু ৮৪.৮৫কোটি টকা মুকলি কৰি দিয়া হৈছে। মিজোৰামৰ বাবে ৩,৪৭৭কোটি আৰু ৫১.৯১ কোটি টকা মোকোলাই দিয়া হৈছে। নাগালেণ্ডৰ বাবে ৫,০০৯.৭ কোটি আৰু ৩৮.৮৭ কোটি টকা মোকোলাই দিয়া হৈছে। ছিকিমৰ বাবে ৯৩৫.০২ কোটি আৰু ৫১.৬৮ কোটি টকা মোকোলাই দিয়া হৈছে আৰু ত্ৰিপুৰাৰ বাবে ৩,০১৫.৩৪ কোটি আৰু ৬৪.৫৫ কোটি টকা চলিত বিত্তীয় বৰ্ষৰ বাবে অনুমোদন কৰা হৈছে।