টকাৰ বিনিময়ত বিক্ৰী কৰা হৈছিল ভুৱা মেডিকেল ডিগ্ৰী । আনকি অষ্টম শ্ৰেণীৰ উত্তীৰ্ণসকলেও টকাৰে মেডিকেলৰ ডিগ্ৰী লাভ কৰিছিল। এই ঘটনাৰ তদন্ত কৰি গুজৰাট আৰক্ষীয়ে ১৪জন লোকক গ্ৰেপ্তাৰ কৰিছে।
সূত্ৰ অনুসৰি আটক কৰা লোকসকলৰ পৰা ১২০০ খন ভুৱা প্ৰমাণ পত্ৰ উদ্ধাৰ কৰা হৈছে।
প্ৰাথমিক তদন্ত অনুসৰি, ‘ব’ৰ্ড অৱ ইলেক্ট্ৰ’ হোমিঅ’পেথিক মেডিচিন’ নামৰ এটা ভুৱা সংগঠন গঠন কৰা হৈছিল। সংগঠনটোক গুজৰাট চৰকাৰৰ দ্বাৰা অনুমোদিত বুলি দাবী কৰা হৈছিল।
জনা যায় যে ভাৰতত ইলেক্ট্ৰ’ হোমিঅ’পেথী সন্দৰ্ভত কোনো নিৰ্দিষ্ট নিয়ম-নীতি নথকাৰ বাবে অভিযুক্তই এই সংস্থাটো খুলিবলৈ পৰিকল্পনা কৰিছিল।
আৰক্ষীৰ তথ্য অনুসৰি ৭০ হাজাৰ টকাৰ বিনিময়ত অষ্টম মান উত্তীৰ্ণসকলক চিকিৎসাৰ ডিগ্ৰী প্ৰদান কৰা হয়। ভুৱা ডিগ্ৰী লাভ কৰা সকলে যি ৱেবছাইটত পঞ্জীয়ন কৰিছিল সেই ৱেবচাইটটোও ভুৱা আছিল। লগতে জনা যায় যে ধন দিয়াৰ ১৫ দিনৰ ভিতৰত ভুৱা মেডিকেল ডিগ্ৰী দিয়া হৈছিল। যাৰ ম্যাদ আছিল এবছৰ। এবছৰৰ শেষত ৫ৰ পৰা ১৫ হাজাৰ টকাত নবীকৰণ কৰিব লগা হৈছিল।
ভুৱা চিকিৎসকসকলক কোৱা হৈছিল যে সেই প্ৰমাণপত্ৰ দেখুৱাই তেওঁলোকে এলোপেথী আৰু হোমিঅ’পেথী দুয়োটাৰে চিকিৎসা কৰিব পাৰে।
গুজৰাট আৰক্ষীয়ে এনে তিনিজন ভুৱা চিকিৎসকক গ্ৰেপ্তাৰ কৰিছে। এই চক্ৰটোৰ মূল অভিযুক্ত ৰাকেশ গুজৰাটীকো গ্ৰেপ্তাৰ কৰা হৈছে।
