নৱম শ্ৰেণীত অধ্যয়ণৰত এগৰাকী ১৪ বছৰীয়া কিশোৰীয়ে আত্মহত্যা কৰাক লৈ ত্ৰিপুৰাত সৃষ্টি হৈছে তীব্ৰ প্ৰতিক্ৰিয়াৰ।
আত্মহত্যাৰ ঘটনাটো সংঘটিত হৈছে ত্ৰিপুৰাৰ চেপাহিজালা জিলাৰ বিশালগড় অঞ্চলৰ আৰালিয়া গাঁৱত।
নৱম শ্ৰেণীত পঢ়ি থকা ছাত্ৰীগৰাকীয়ে নিজৰ প্ৰেমিকে কৰা প্ৰতাৰণাৰ বাবে আত্মহত্যা কৰা বুলি জানিব পৰা গৈছে।
কিশোৰী গৰাকীৰ পৰিয়ালৰ সদস্যসকলে বুধবাৰে পুৱা প্ৰায় ৩.৩০ মান বজাত এটা কোঠাৰ চিলিং ফেনত তেওঁৰ মৃতদেহটো ওলমি থকা দেখাৰ পিছতে এই ঘটনা পোহৰলৈ আহে।
এই ঘটনাটোৱে ওচৰ পাজৰৰ লোকক হতভম্ব কৰি তুলিছে।
পিছত ঘটনাস্থলত বিশালগড় মহিলা আৰক্ষী থানাৰ লোক উপস্থিত হৈ মৃতদেহ উদ্ধাৰ কৰি প্ৰাথমিক তদন্ত আৰম্ভ কৰি দিয়ে।
উল্লেখ্য যে কিশোৰী গৰাকীয়ে আত্মহত্যা কৰাৰ পূৰ্বে ছুইচাইড নোট এখনো লিখি থৈ যায়। আৰক্ষীয়ে ছুইচাইড নোটখন এখন কিতপৰ মাজৰ পৰা উদ্ধাৰ কৰে।
ছুইচাইড নোটখনত স্পষ্টকৈ উল্লেখ আছে যে কিশোৰী গৰাকীক প্ৰেমিকৰ পৰা পোৱা প্ৰতাৰণা সহ্য কৰিব নোৱাৰি এই চৰম সিদ্ধান্ত বাচি লয়।