দেশত উদ্বেগজনক হাৰত বৃদ্ধি পাইছে ধৰ্ষণ তথা নাৰীজনিত অপৰাধৰ ঘটনা। পিছে সম্প্ৰতি পোহৰলৈ অহা এনে এক অপৰাধৰ ঘটনাই চকু কপালত তুলিছে সকলোৰে। প্ৰতিশোধৰ তাড়নাত কোনো লোক কেনে এক নিকৃষ্ট পৰ্যায়লৈ নামিব পাৰে, তাৰ এক ঘৃণনীয় তথা চাঞ্চল্যকৰ উদাহৰণ হৈ পৰিছে এটি ১৫ বৰ্ষীয় কিশোৰে সংঘটিত কৰা নৃশংস কাণ্ড।
এগৰাকী ব্যক্তিৰ সৈতে কাজিয়াত লিপ্ত হোৱাৰ পিছত এই কাজিয়াৰ প্ৰতিশোধ লোৱাৰ তাড়নাত এটি কিশোৰে ব্যক্তিগৰাকীৰ ৯ বৰ্ষীয় কন্যা সন্তানটিক ধৰ্ষণ কৰি হত্যা কৰিছে। এই নৃশংস কাণ্ড পোহৰলৈ অহাৰ পিছত সৃষ্টি হৈছে তীব্ৰ চাঞ্চল্যৰ।
মহাৰাষ্ট্ৰৰ কল্যাণত সংঘটিত হৈছে এই নৃশংস কাণ্ড। বৃহস্পতিবাৰে পুৱা কল্যাণ ৰেল ষ্টেচনৰ সমীপৰ কল্যাণী পশ্চিম অঞ্চলৰ এখন আৱাসিক সমিতিৰ চৌহদত এটি ৯ বছৰীয়া শিশুৰ মৃতদেহ উদ্ধাৰ হোৱাৰ পিছতে এই ঘটনা পোহৰলৈ আহে। ঘটনা সন্দৰ্ভত তথ্য লাভ কৰি আৰক্ষীৰ এটা দল অঞ্চলটোত উপস্থিত হয়।
ইয়াৰ পাছতে আৰক্ষীয়ে তদন্ত আৰম্ভ কৰে। আৰক্ষীয়ে চিচিটিভি ফুটেজ পৰীক্ষা কৰি কিশোৰগৰাকীক চিনাক্ত কৰে আৰু অঞ্চলটোৰ স্থানীয় লোকক কিশোৰটিৰ বিষয়ে সোধা-পোছা কৰি জিম্মাত লয়।
জেৰাৰ সময়ত অভিযুক্ত কিশোৰগৰাকীয়ে আৰক্ষীক এই চাঞ্চল্যকৰ ঘটনাৰ বিষয়ে অৱগত কৰে। তেওঁৰ ভাষ্য মতে, দুদিনমান পূৰ্বে কন্যা শিশুটিৰ পিতৃৰ সৈতে তেওঁৰ তিক্ত কাজিয়া হৈছিল আৰু এই কাজিয়াৰ সময়ত ব্যক্তিগৰাকীয়ে তেওঁক শাৰীৰিকভাৱে আক্ৰমণো কৰিছিল।
এই আক্ৰমণৰ প্ৰতিশোধ ল’বলৈকে কিশোৰজনে ব্যক্তিগৰাকীৰ ৯ বৰ্ষীয় কন্যা সন্তানটিক অপহৰণ কৰি ধৰ্ষণ কৰে আৰু তাৰ পিছত ব্লেডেৰে ডিঙি কাটি হত্যা কৰে।
কিশোৰটিৰ স্বীকাৰোক্তিৰ ভিত্তিত স্থানীয় মহাত্মা ফুলে আৰক্ষীয়ে যৌন অপৰাধৰ পৰা শিশু সুৰক্ষা আইন (POCSO) ৰ অধীনত গোচৰ ৰুজু কৰি তেওঁক পৰ্যবেক্ষণ গৃহলৈ প্ৰেৰণ কৰে।
ঘটনা সন্দৰ্ভত অধিক তথ্য-প্ৰমাণৰ বাবে তদন্ত অব্যাহত আছে বুলি এগৰাকী আৰক্ষী বিষয়াই সংবাদ মাধ্যমৰ আগত অৱগত কৰে।
