নেপালৰ কাঠমাণ্ডুৰ ত্ৰিভুৱন আন্তঃৰাষ্ট্ৰীয় বিমানবন্দৰত (টিআইএ) উৰণৰ সময়ত সৌৰ্য এয়াৰলাইন্সৰ ৯এন-এমই (চিআৰজে ২০০) বিমান দুৰ্ঘটনাগ্ৰস্ত হোৱাৰ ফলত ১৮ জন লোকৰ মৃত্যু হয়। বিমানখনৰ পাইলট ৩৭ বছৰীয়া মনীষ শাক্য দুৰ্ঘটনাটোৰ পৰা ৰক্ষা পৰিলেও সহ-পাইলট সুশান্ত কটুৱালো নিহতসকলৰ ভিতৰত আছিল।
ধ্বংসাৱশেষৰ পৰা শাক্যক উদ্ধাৰ কৰি চিনামংগলৰ ওচৰৰ চিকিৎসালয়লৈ লৈ যোৱা হয় চিকিৎসাৰ বাবে। টি আই এৰ তথ্য বিষয়া জ্ঞানেন্দ্ৰ ভূলে দ্য হিমালয়ানক জনায় যে বিমানখনত বিমান সংস্থাটোৰ কাৰিকৰী কৰ্মচাৰী আছিল। বিমানখন ৰক্ষণাবেক্ষণৰ বাবে পোখাৰা আঞ্চলিক বিমানবন্দৰলৈ লৈ যোৱা হৈছিল।
ইয়াৰ লগত জড়িত বিমানখন হৈছে ৯এন-এএমই পঞ্জীয়ন থকা বম্বাৰ্ডিয়াৰ চিআৰজে-২০০ইআৰ। ২০০৩ চনত নিৰ্মাণ কৰা এই বিমানখন।
দুৰ্ঘটনাৰ পাছত বিমানখনৰ পৰা ধোঁৱা ওলোৱা দেখা গৈছিল। উদ্ধাৰ অভিযানৰ বাবে আৰক্ষী জোৱান আৰু অগ্নিনিৰ্বাপক বাহিনীক স্থানলৈ মোতায়েন কৰা হৈছে।
প্ৰত্যক্ষদৰ্শীয়ে জনোৱা মতে, বিমানখনে ৰানৱেৰ দক্ষিণ মূৰৰ পৰা উৰা মাৰিবলৈ গৈ থকা অৱস্থাত হঠাতে উইং টিপটো মাটিত খুন্দা মাৰি উলটি যায় বুলি দ্য কাঠমাণ্ডু পোষ্টে প্ৰকাশ কৰিছে। লগে লগে জুই লগা বিমানখন ৰানৱেৰ পূব দিশত দুৰ্ঘটনাগস্ত হয়।
২০১৯ চনত ভাৰতৰ কুবেৰ গ্ৰুপে ৬৩ কোটি নেপালী টকাত ক্ৰয় কৰিছিল এই বিমান সংস্থাটো। ২০২১ চনত বিমান সংস্থাটোৱে নিজকে কুবেৰ এয়াৰলাইন্স নামেৰে পুনৰ ব্ৰেণ্ড কৰিব বুলি খবৰ ওলাইছিল যদিও ইয়াক স্থগিত ৰখা হৈছিল।
কাঠমাণ্ডু বিমানবন্দৰে ২০১৮ চনৰ ৬ ডিচেম্বৰত সৌৰ্য এয়াৰলাইন্সৰ সকলো বিমান সেৱা বন্ধ কৰি দিছিল, কাৰণ কেৰিয়াৰটোৱে ঋণ পৰিশোধ কৰিব নোৱাৰিলে। এক প্ৰতিবেদনত কোৱা হৈছে যে বিমানবন্দৰটোৰ ওচৰত থকা ৩ লাখ ৫৫ হাজাৰ ডলাৰৰ ঋণৰ এটা অংশ পৰিশোধ কৰাৰ পাছত ২০২০ চনত ইয়াক পুনৰ কাৰ্যকলাপ আৰম্ভ কৰিবলৈ দিয়া হৈছিল।
