পশ্চিমবংগত সংকট: মণিপুৰৰ ১৮৫গৰাকী নাৰ্ছে চাকৰি এৰি উভতিল নিজ ৰাজ্যলৈ

কৰ’না ভাইৰাছ মহামাৰীৰ বিৰুদ্ধে যুঁজ চলি থকাৰ মাজতে পশ্চিমবংগত এক বৃহৎ সংখ্যক নাৰ্ছে চাকৰি বাদ দি গৃহ ৰাজ্যলৈ প্ৰত্যাৱৰ্তন কৰাত ৰাজ্যখনত এক সংকটৰ সৃষ্টি হৈছে।

বাতৰি অনুসৰি, পশ্চিমবংগৰ বিভিন্ন হাস্পাততলত কৰ্মৰত মণিপুৰৰ ১৮৫গৰাকী নাৰ্ছে চাকৰিৰ পৰা পদত্যাগ কৰি গৃহৰাজ্যলৈ উভতি গৈছে।

জানিব পৰা মতে, উত্তৰ-পূবৰ ৰাজ্যসমূহৰ লগতে উৰিষ্যাতো বহু সংখ্যক নাৰ্ছে চাকৰি এৰাৰ সম্ভাৱনা আছে।

এনেদৰে বৃহৎ সংখ্যক নাৰ্ছে চাকৰি এৰাৰ প্ৰকৃত কাৰণ জানিব পৰা হোৱা নাই।

ইয়াৰ মাজতে একাংশ মহলে নাৰ্ছৰ পদত্যাগৰ ঘটনাত কেন্দ্ৰৰ হস্তক্ষেপ দাবী কৰাৰো বাতৰি পোৱা গৈছে।

পশ্চিমবংগত কৰ’না ভাইৰাছৰ ফলত এতিয়ালৈকে ২৪৬১জন লোক আক্ৰান্ত হৈছে আৰু ইয়াৰে ভিতৰত ২২৫জন লোকৰ মৃত্যু হৈছে।

ৰাজ্যখনত এতিয়ালৈকে ৮২৯জন কৰ’না আক্ৰান্ত লোক সুস্থ হৈ উঠিছে।

আনহাতে, ৰাজ্যখনত কৰ’না আক্ৰান্ত লোকৰ মৃত্যুৰ সংখ্যাকলৈ ইয়াৰ মাজতে এক বিবাদো পোহৰলৈ আহিছিল।

এতিয়া এনেদৰে বৃহৎ সংখ্যক নাৰ্ছে চাকৰি এৰি গুচি যোৱাৰ ঘটনাই ৰাজ্যখনত জটিল সমস্যাৰ সৃষ্টি কৰাৰ সম্ভাৱনাই দেখা দিছে।