দেশৰ সংবিধানৰ মূল প্ৰণেতা ড0 ভীমৰাও আম্বেদকাৰৰ ১২৭সংখ্যক জন্ম-জয়ন্তীৰ লগত সংগতি ৰাখি কেন্দ্ৰীয় চৰকাৰে ১৪ এপ্ৰিলৰ পৰা ৬মে’ লৈ দেশজুৰি আৰম্ভ কৰা গ্ৰাম স্বৰাজ অভিযান মাজুলীটো ৰূপায়ন কৰিছে জিলা প্ৰশাসনে।
এই অভিযানৰ অংশ হিচাপে আজি(শুকুৰবাৰ) নামনি মাজুলীৰ চিলাকলা গাঁও পঞ্চায়তত এখন ‘উজ্বলা পঞ্চায়ত’ প্ৰশাসনে অনুষ্ঠিত কৰে। প্ৰধান মন্ত্ৰী উজ্জ্বলা যোজনা সন্দৰ্ভত গাঁও পঞ্চায়তখনৰ এলেকাধীন দুখীয়া পৰিয়াল সমূহৰ লগতে স্থানীয় বাসিন্দাসকলৰ মাজত সজাগতা সৃষ্টিৰ লক্ষ্যৰে জিলা প্ৰশাসনে এই উজ্জ্বলা পঞ্চায়তৰ আয়োজন কৰে।
জিলা খাদ্য আৰু অসামৰিক যোগান তথা গ্ৰাহক পৰিক্ৰমা বিভাগৰ উদ্যোগত আৰু আই অ’ চি ৰ সহযোগত আয়োজিত গ্ৰাম স্বৰাজ অভিযানৰ অধীনৰ উজ্জ্বলা পঞ্চায়তত সভাপতিত্ব কৰে গাঁও পঞ্চায়তৰ সভানেত্ৰী মীনাক্ষী মিলিয়ে।
ইফালে কাৰ্যসূচীৰ অংশ হিচাপে চুলাকলা গাঁও পঞ্চায়তৰ ২০ টা দুখীয়া পৰিয়ালৰ এগৰাকীকৈ মহিলা হিতাধিকাৰীক যোজনাৰ অধীনত বিনামূলীয়া ৰন্ধন গেছৰ চিলিণ্ডাৰ, ষ্টোভ, বাৰ্ণাৰ আদি সহ এল পি জি গ্ৰাহকৰ কাৰ্ড বিতৰণ কৰে।
তাৰোপৰি এই আঁচনিৰ অধীনত এনে বিনামূলীয়া ৰন্ধন গেছৰ সংযোগ লাভ কৰা গাঁও পঞ্চাতখনৰ অন্তৰ্গত দুখীয়া পৰিয়ালৰ মহিলা হিতাধিকাৰী সকলৰ পৰা আঁচনিখনৰ জৰিয়তে লাভ কৰা সুফল সন্দৰ্ভত মুকলি মত বিনময়ৰ এক অনুষ্ঠানো অনুষ্ঠিত কৰে।
