উজনি অসমৰ চৰাইদেউ জিলাৰ টীয়কঘাটত গণৰাজ্য দিৱসৰ দিনাখন সংঘটিত হোৱা বিস্ফোৰণৰ লগত জড়িত থকাৰ সন্দেহত আৰক্ষীয়ে দুগৰাকী আলফা(স্বা)ৰ কেডাৰক গ্ৰেপ্তাৰ কৰে।
গ্ৰেপ্তাৰ হোৱা আলফা(স্বা)ৰ কেডাৰ দুগৰাকী মানস জ্যোতি পদ্মাৱত ওৰফে বাস্তৱ জ্যোতি অসম(২৬)আৰু চাও লাখি লোংনো ওৰফে ৰুবুল অসম(৩০)বুলি চিনাক্ত কৰা হৈছে।
বাস্তৱ জ্যোতি অসমে ২০০৯ চনত আলফাত যোগদান কৰাৰ বিপৰীতে ৰুবুল অসমে ২০১৭ চনত বিদ্ৰোহী সংগঠনটোত যোগদান কৰিছিল।
আৰক্ষীৰ সূত্ৰ অনুসৰি, আটকাধীন কেডাৰ দুগৰাকীৰ পৰা ৫.৫৬ এমএম এইচ কে ৩৩ এটা, ৩৩ ৰাউণ্ড সজীৱ গুলী আৰু দুটা মেগজিন জব্দ কৰা হয়।
আৰক্ষী আৰু সেনাৰ যুটীয়া অভিযানত আলফা(স্বা)ৰ কেডাৰ দুগৰাকীক আটক কৰা হয় বুলি চৰাইদেউৰ আৰক্ষী অধীক্ষক আনন্দ মিশ্ৰই প্ৰকাশ কৰে।
‘‘আলফা(স্বা)ৰ কেডাৰ দুগৰাকীক আটক কৰাৰ পাছতে সেনাৰ বিষয়া সকলে তেওঁলোকক সোধ-পোছ কৰে আৰু পৰৱৰ্তী সময়ত আৰক্ষীৰ হাতত গটাই দিয়ে। চৰাইদেউৰ বিস্ফোৰণৰ লগত জড়িত দলত দুয়োগৰাকী আলফা(স্বা)কেডাৰ জড়িত আছিল,’’ মিশ্ৰই লগতে কয়।
আনহাতে, চৰাইদেউৰ বিস্ফোৰণৰ পাছতে আলফা(স্বা)ৰ কেডাৰ দুগৰাকীয়ে নাগালেণ্ডত আত্মগোপন কৰি আছিল বুলিও মিশ্ৰই লগতে কয়।
তদুপৰি, বিস্ফোৰণৰ ঘটনাৰ লগত জড়িত প্ৰতিগৰাকী ব্যক্তিক আটক কৰাৰ বাবে আৰক্ষীয়ে তদন্ত অব্যাহত ৰাখিছে বুলি আৰক্ষী সূত্ৰত প্ৰকাশ পাইছে।