সমাগত ২০২৬ বিধানসভা নিৰ্বাচনৰ প্ৰতি লক্ষ্য ৰাখি ৰাজনৈতিক দলসমূহৰ তৎপৰতা বৃদ্ধি পোৱাৰ সময়তে, অসমত ছয় জনগোষ্ঠীৰ জনজাতিকৰণৰ দাবীক লৈ আৰম্ভ হোৱা প্ৰতিবাদেও ক্ৰমে অধিক জংগী ৰূপ লৈছে।
জনজাতিকৰণৰ ন্যায্য দাবীত অসমৰ ভূমিপুত্ৰ আহোম, কোচ-ৰাজবংশী, মৰাণ, চুতীয়া আদি ছয় জনগোষ্ঠীয়ে পৃথকে পৃথকে ধাৰাবাহিক আন্দোলন চলাই আছে।
এই প্ৰতিবাদৰ অংশ হিচাপেই বুধবাৰে নিশা জনজাতিকৰণৰ দাবীত কেইবাহাজাৰো চুতীয়া জনগোষ্ঠীৰ লোকে ধেমাজি সদৰৰ ৰাজপথ কঁপাই তোলে। নিজৰ অধিকাৰ সাব্যস্ত কৰাৰ বাবে সন্ধিয়াৰ ভাগত দলে-বলে ৰাজপথলৈ ওলাই অহা শ শ চুতীয়া লোকে এক বিশাল জোঁৰ সমদল বাহিৰ কৰে।
চুতীয়া যুৱ সন্মিলনৰ জিলা সমিতিৰ সভাপতি ত্ৰিদীপ দাস আৰু সাধাৰণ সম্পাদক হীৰেন চুতীয়াৰ নেতৃত্বত এই সমদল ধেমাজি আন্তঃৰাজ্যিক বাছ আস্থানৰ বাকৰিৰ পৰা উলিওৱা হয়। অনুমান কৰা হৈছে যে এই প্ৰতিবাদী কাৰ্যসূচীত প্ৰায় দহ হাজাৰ চুতীয়া লোকে অংশ লৈ কেন্দ্ৰীয় আৰু ৰাজ্য চৰকাৰৰ বিৰুদ্ধে ব্যাপক প্ৰতিবাদ সাব্যস্ত কৰে।
এই জোঁৰ সমদলক সন্মুখৰ পৰা নেতৃত্ব দিছিল চুতীয়া যুৱ সন্মিলনৰ কেন্দ্ৰীয় সমিতিৰ সভাপতি কৌস্তভ চুতীয়াই। নেতাগৰাকীয়ে কেন্দ্ৰীয় আৰু ৰাজ্য চৰকাৰে দীৰ্ঘদিন ধৰি চুতীয়াসকলক জনজাতিকৰণৰ পৰা বঞ্চিত কৰি অহাৰ বাবে তীব্ৰ ক্ষোভ প্ৰকাশ কৰে।
কেন্দ্ৰীয় সমিতিৰ সভাপতি কৌস্তভমনি চুতীয়াই চৰকাৰক কঠোৰ ভাষাৰে সকীয়নি দি কয়, “তেওঁলোকে শাসনলৈ আহিলে এশ দিনৰ ভিতৰত জনজাতিকৰণ দিম বুলি প্ৰতিশ্ৰুতি দিছিল। কিন্তু বহু বছৰ পাৰ হৈ গ’ল, লুইতৰ বুকুৰে পানী বাগৰি গ’ল, কিন্তু তেওঁলোকে প্ৰতিশ্ৰুতি ৰাখিব নোৱাৰিলে।”
তেওঁ লগতে কয়, “২৫ নৱেম্বৰত ৰাজ্যসভাত জনজাতিকৰণৰ প্ৰতিবেদন দাখিল কৰি কেন্দ্ৰীয় চৰকাৰলৈ প্ৰেৰণ কৰিব বুলি প্ৰতিশ্ৰুতি দিছে। সেই প্ৰতিশ্ৰুতি তেওঁলোকে চুতীয়াসকলৰ সপক্ষে দিবই লাগিব। নহ’লে ইয়াতকৈ জংগী আন্দোলন গঢ়ি তোলা হ’ব।”
জিলা সমিতিৰ সম্পাদক হীৰেন চুতীয়ায়ো জনজাতিকৰণ নিদিলে আগন্তুক দিনত তীব্ৰ আন্দোলন গঢ়ি তুলিব বুলি চৰকাৰক সকীয়নি দিয়ে।
