আমেৰিকাই কেৰিবিয়ান অঞ্চলত কেইবাখনো যুদ্ধজাহাজ, বৃহৎ সংখ্যক সেনা আৰু যুদ্ধবিমান মোতায়েন কৰিবলৈ আৰম্ভ কৰিছে। পলিটিকো নামৰ এটা সংবাদ প্ৰতিষ্ঠানৰ প্ৰতিবেদনত এই দাবী কৰা হৈছে। এই খবৰ পোহৰলৈ অহাৰ পিছৰে পৰা সমগ্ৰ বিশ্বতে চৰ্চা আৰম্ভ হৈছে যে আমেৰিকাই কিউবাত কোনো সামৰিক অভিযান চলাবলৈ প্ৰস্তুতি চলাইছে নেকি। প্ৰতিবেদনখনৰ মতে, যদি কিউবাত সামৰিক অভিযান চলাবলগীয়া পৰিস্থিতিৰ সৃষ্টি হয়, তেন্তে যাতে পলম নকৰাকৈ তৎকালিনভাৱে ব্যৱস্থা ল’ব পৰা যায়, তাৰ বাবেই পেণ্টাগনে এই আগতীয়া প্ৰস্তুতি চলাইছে।
উল্লেখ্য যে ইয়াৰ পূৰ্বেও পশ্চিম এছিয়াত সামৰিক সংঘাত আৰম্ভ হোৱাৰ ঠিক আগে আগে আমেৰিকাই এইদৰেই সেনা আৰু যুদ্ধজাহাজ মোতায়েন কৰা আৰম্ভ কৰিছিল। সেই সময়তো উপসাগৰীয় অঞ্চলত আমেৰিকাৰ এই তৎপৰতাক লৈ নানা সন্দেহৰ সৃষ্টি হৈছিল। পাছত দেখা গ’ল যে তাৰ কিছুদিনৰ ভিতৰতে আমেৰিকা আৰু ইজৰাইলে ইৰানত সামৰিক অভিযান আৰম্ভ কৰে, যি যুদ্ধ এতিয়াও চলি আছে। এই যুদ্ধৰ পৰিৱেশৰ মাজতে এতিয়া আকৌ কেৰিবিয়ান অঞ্চলত আমেৰিকাই সেনা মোতায়েন কৰাৰ বাবে কিউবাক কেন্ৰ কৰি আন এক সামৰিক অভিযানৰ জল্পনা-কল্পনা বৃদ্ধি পাইছে।
প্ৰতিবেদন অনুসৰি আমেৰিকাৰ যুদ্ধজাহাজ ইউ এছ এছ নিমিটজ ইতিমধ্যে কেৰিবিয়ান অঞ্চলত উপস্থিত হৈছে। ইয়াৰ উপৰিও ২৫০০ মেৰিন সেনা লৈ আন এখন যুদ্ধজাহাজ ইউ এছ এছ কিয়াৰচাৰ্জ কেৰিবিয়ানৰ দিশে আগবাঢ়িছে। পেণ্টাগনৰ এজন উচ্চপদস্থ বিষয়া মাৰ্ক কানচিয়ানে ইংগিত দিছে যে যিকোনো আক্ৰমণ প্ৰতিহত কৰিবলৈ প্ৰাথমিক অৱস্থাত এই সামৰিক শক্তি মোতায়েন কৰা হৈছে যদিও প্ৰয়োজন হ’লে ইয়াক সামৰিক অভিযানৰ বাবেও ব্যৱহাৰ কৰা হ’ব। অৱশ্যে যোৱা ১০ মাহতকৈও অধিক সময় ধৰি কেৰিবিয়ান অঞ্চলত আমেৰিকাৰ কেইবাখনো যুদ্ধজাহাজ আছিল। কিন্তু শেহতীয়াকৈ যিদৰে হঠাতে সেনাৰ তৎপৰতা বৃদ্ধি কৰা হৈছে, সি নতুন সামৰিক অভিযানৰ আশংকাক অধিক তীব্ৰ কৰি তুলিছে।
পশ্চিম এছিয়াৰ যুদ্ধ চৰম পৰ্যায়ত থকাৰ সময়তে যোৱা মাৰ্চ মাহত আমেৰিকাৰ ৰাষ্ট্ৰপতি ডনাল্ড ট্ৰাম্পে সকীয়াই দিছিল যে ইৰানৰ যুদ্ধ শেষ হোৱাৰ পিছতে কিউবাৰ ওপৰত চকু দিয়া হ’ব। সেই সময়ত ট্ৰাম্পে কৈছিল যে কিউবাৰ কমিউনিষ্ট চৰকাৰৰ পতন এতিয়া মাথোঁ সময়ৰ কথা। তেওঁ কিউবাক এখন দুৰ্বল দেশ বুলিও উল্লেখ কৰিছিল। ইয়াৰ উপৰিও ভেনিজুৱেলাত সামৰিক অভিযান চলোৱাৰ পিছত আমেৰিকাৰ ৰাষ্ট্ৰপতিগৰাকীয়ে দাবী কৰিছিল যে কিউবা দখল কৰাটো এতিয়া কেৱল সময়ৰ কথাহে। গতিকে কেৰিবিয়ান অঞ্চলত আমেৰিকান সেনাৰ এই নতুন তৎপৰতাই ট্ৰাম্পৰ সেই পুৰণি ভাবুকিৰ কথাই সকলোকে পুনৰ সোঁৱৰাই দিছে।
