তুৰ্কীৰ পৰিচালক মোহাম্মেট টাইফুৰ আইডিনৰ চলচ্চিত্ৰ ‘ব্লেক ক্ৰ’ৰে আজি সামৰণি পৰে যোৱা ২৫ অক্টোবৰৰ পৰা গুৱাহাটীৰ শংকৰদেৱ কলাক্ষেত্ৰত আৰম্ভ হোৱা ২য় গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱ।
এইবাৰৰ মহোৎসৱত অনুষ্ঠিত ‘উত্তৰ-পূব চলচ্চিত্ৰ প্ৰতিযোগিতাত’ অৰূপ মান্নাৰ ‘আমৃত্যু’এ শ্ৰেষ্ঠ ছবিৰ শিতানত ‘গ’ল্ড কেমেৰা’ লাভ কৰাৰ বিপৰীতে মঞ্জুল বৰুৱাৰ ‘কানিন’এ লাভ কৰে ‘চিলভাৰ কেমেৰা’। ইয়াৰ বাবে দুয়োখন চলচ্চিত্ৰকে ক্ৰমে ২ লাখ আৰু ১.৫ লাখ টকাৰ চেক প্ৰদান কৰা হয়।
আনহাতে, ‘কানিন’ত কৰা অভিনয়ৰ বাবে পাৰ্থ হাজৰিকা আৰু ‘কেলেণ্ডাৰ’ত কৰা অভিনয়ৰ বাবে অৰুণ নাথক বিচাৰকৰ বিশেষ বঁটা প্ৰদান কৰা হয়।
উল্লেখযোগ্য যে বঁটা বিতৰণী অনুষ্ঠানৰ অন্তত জ্যোতি চিত্ৰবনৰ অধ্যক্ষ পবিত্ৰ মাৰ্ঘেৰিটাই নৰ্থ-ইষ্ট নাওৰ আগত অহা ৩ মাহৰ ভিতৰত গুৱাহাটীত ‘শিশু চলচ্চিত্ৰ মহোৎসৱ’ আৰু ‘তথ্য চিত্ৰ মহোৎসৱ’ অনুষ্ঠিত কৰা হ’ব বুলি সদৰী কৰে।
তেওঁ লগতে কয় যে ইতিমধ্যে অসম চৰকাৰৰ সাংস্কৃতিক মন্ত্ৰণালয়ে শিশু চলচ্চিত্ৰ মহোৎসৱ আৰু তথ্য চিত্ৰ মহোৎসৱ অনুষ্ঠিত কৰাৰ বাবে অনুমোদন জনাইছে।
সামৰণি অনুষ্ঠান মুখ্য অতিথি হিচাপে অসম চৰকাৰৰ সাংস্কৃতিক ও পৰিক্ৰমা দপ্তৰৰ মন্ত্ৰী নৱ কুমাৰ দলে, ভাৰতৰ বিশিষ্ট চলচ্চিত্ৰ পৰিচালক ছাজি এন কৰুণ, শ্ৰীলংকাৰ চলচ্চিত্ৰ নিৰ্মাতা চন্দ্ৰ ৰতনম, প্ৰখ্যত মণিপুৰীৰ চলচ্চিত্ৰকাৰ অৰিবাম শ্যাম শৰ্মা, এষ্ট’নিয়াৰ ৰাষ্ট্ৰদূত ৰিহ’ ক্ৰুভ, চিংগাপুৰৰ উপ উচ্চ আয়ুক্ত নেং বন ইয়ান আৰু অসমৰ সাংস্কৃতিক মন্ত্ৰণালয়ৰ আয়ুক্ত সচিব প্ৰীতম শইকীয়া উপস্থিত থাকে।
