উত্তৰ-পূবত এন দি এ’ৰ বিপুল বিজয়ৰ পিছত অঞ্চলটোৰ পৰা পূৰ্বতকৈ অধিক মন্ত্ৰিত্বৰ আশা বৃদ্ধি পাইছে।
১৬সংখ্যক লোকসভা ভংগ কৰাৰ বাবে প্ৰধান মন্ত্ৰী নৰেন্দ্ৰ মোদীয়ে শুকুৰবাৰে গধূলি দক্ষিণ ব্লকত এক কেবিনেট বৈঠক আহ্বান কৰিছে। এই গুৰুত্বপূৰ্ণ বৈঠকখনেই নতুন চৰকাৰ সন্দৰ্ভতো গুৰুত্বপূৰ্ণ সিদ্ধান্ত লোৱাৰ সম্ভাৱনা আছে।
শপতগ্ৰহণৰ দিনক লৈ আনুষ্ঠানিক কোনো ঘোষণা হোৱা নাই যদিও, ২৬ বা ২৭ মে’ত মোদীয়ে পৰৱৰ্তী চৰকাৰ গঠন কৰাৰ সম্ভাৱনা আছে।
নতুন চৰকাৰখনত মন্ত্ৰিত্বৰ স্থান পোৱাক লৈ উত্তৰ-পূৰ্বাঞ্চলৰ পৰা নতুনকৈ নিৰ্বাচিত বহুকেইজন বিজেপি সাংসদ আশাবাদী। বিজেপিয়ে ১৪খন আসন জিকিছে, লগতে এন দি এ’ৰ সহযোগীসকলে উত্তৰ-পূবত আৰু তিনিখন আসনত জয় লাভ কৰিছে।
১৬সংখ্যক লোকসভাত উত্তৰ-পূবৰ পৰা বিজেপিৰ মাত্ৰ আঠজন সাংসদ থকা অৱস্থাত চৰকাৰত আছিল অঞ্চলটোৰ দুজন কনিষ্ঠ মন্ত্ৰী—কিৰেন ৰিজিজু (গৃহ) আৰু ৰাজেন গোহাঁই (ৰে’ল)।
এইবাৰ উত্তৰ-পূবৰ মুঠ ২৫টা লোকসভা সমষ্টিৰ ১৭টাই দখল কৰিবলৈ সক্ষম হৈছে বিজেপিকে ধৰি এন দি এ’ৰ অংশীদাৰসকল। স্বাভাৱিকতে, অধিক মন্ত্ৰীৰ আশা বৃদ্ধি হ’বলৈ আৰম্ভ কৰিছে।
গৃহৰাজ্য মন্ত্ৰী হিচাপে সুন্দৰ প্ৰদৰ্শনৰ বাবে মোদীৰ দললৈ ৰিজিজুৰ প্ৰত্যাৱৰ্তন নিশ্চিত বুলিয়েই বিজেপিৰ উত্তৰ-পূবৰ নেতাসকল আশাবাদী।
লোকসভা নিৰ্বাচনটোত ৰাজেন গোহাঁয়ে নগাঁৱৰ পৰা প্ৰতিদ্বন্দ্বিতা নকৰিলে যদিও অসমৰ পৰা এখন নতুন মুখে মোদীৰ নতুন চৰকাৰত স্থান পাব।
মোদীৰ যিহেতু চমক দিয়াৰ অভ্যাস আছে, সেয়ে গেৰুৱা দলটোৰ একাংশ নেতা আশাবাদী যে অসমৰ স্বাস্থ্য মন্ত্ৰী হিমন্ত বিশ্ব শৰ্মাই নতুন চৰকাৰত এক কেবিনেট বাব পাব।
অগতানুগতিক সাংগঠনিক দক্ষতাৰ বাবে জনাজাত হিমন্ত বিশ্ব শৰ্মা নতুন দিল্লীত নতুন চৰকাৰখনৰ কাৰণে এক বিশেষ সম্পদ হ’ব পাৰে। মণিপুৰ, ত্ৰিপুৰা আৰু মেঘালয়ত এন দি এ’-নেতৃত্বাধীন চৰকাৰ গঠনত তেওঁৰ ভূমিকাৰ বাবেও তেওঁলৈ এক পুৰস্কাৰ পাপ্য।
তাৰোপৰি, পশ্চিম বংগত বিজেপিয়ে ১৮খন আসন জিকাৰ ক্ষেত্ৰতো শৰ্মাৰ ভূমিকা অস্বীকাৰ কৰিব নোৱাৰি। বিজেপিৰ নিৰ্বাচনী ৰণনীতিক নিখুঁত ৰূপ দিয়াৰ বাবে মমতাৰ বেস্তনত তেওঁ দুসপ্তাহতকৈয়ো অধিক কাল বাহৰ পাতি আছিল।
লোকসভা নিৰ্বাচনত হিমন্ত বিশ্ব শৰ্মাই প্ৰতিদ্বন্দ্বিতা কৰা নাই যদিও, মোদী চৰকাৰত তেওঁৰ মন্ত্ৰিত্ব নুই কৰিব নোৱাৰি।
অত্যন্ত দক্ষ মন্ত্ৰীজনে খুব সোনকালেই উচ্চ সদনত এটা স্থান পাই যাব, আৰু তাৰ বাবে লোকসভাৰ কোনো আসন খালী কৰাৰ প্ৰয়োজন নাই। অহা ৭ জুনত অসমৰ পৰা খালী হোৱা ৰাজ্যসভাৰ আসন দুখনৰ নিৰ্বাচন অনুষ্ঠিত হ’ব।
ৰিজিজু আৰু হিমন্ত বিশ্বৰ লগতে উত্তৰ-পূবৰ তৃতীয়জন মন্ত্ৰী মণিপুৰ নাইবা ত্ৰিপুৰাৰ হোৱাৰ সম্ভাৱনা। লোকসভাৰ প্ৰাক্তন অধ্যক্ষ পূৰ্ণ আগিত’ক চাংমাৰ ছোৱালী আগাথা কে’ চাংমাও মন্ত্ৰীৰ সম্ভাৱ্য তালিকাত থকা বুলি এন পি পিৰ একাংশ নেতা আশাবাদী।
নতুন চৰকাৰখনে ন উদ্যমেৰে কামত ধৰিব খুজিব, কিন্তু অৰুণ জে’ইতলি আৰু সুষমা স্বৰাজৰ দৰে বিজেপিৰ কিছু জ্যেষ্ঠ নেতাই দুৰ্বল স্বাস্থ্যৰ বাবে চৰকাৰত যোগ নিদিয়াৰ সম্ভাৱনা আছে।
তাৰোপৰি, হৰদীপ পুৰী, কে জে এলফ’নছ আৰু মনোজ সিনহাই এই নিৰ্বাচনত পৰাজয় বৰণ কৰিছে।
বিহাৰত জে দি (ইউ)ৰ মসৃণ যাত্ৰালৈ চাই, দলটোৰ সাংসদে প্ৰধান পদবী পোৱাৰ সম্ভাৱনা আছে। ৰামবিলাস পাছৱানৰ এল জে পি আৰু উদ্ধৱ থেকাৰেৰ শিৱসেনায়ো গুৰুত্বপূৰ্ণ পদবী পাব।
এইবুলিও খবৰ আছে যে বিজেপি সভাপতি অমিত শ্বাহে, যাৰ এসময়ত গুজৰাটৰ গৃহ ৰাজ্য মন্ত্ৰীৰ অভিজ্ঞতা আছে, ভাৰতৰ নতুন গৃহ মন্ত্ৰীৰূপে ৰাজনাথ সিঙৰ স্থান ল’ব পাৰে।
আমেথিত বিজয়ৰ পিছত স্মৃতি ইৰানীয়ে মোদী কেবিনেটত আগতকৈ ডাঙৰ দায়িত্ব পোৱাৰ আশা আছে, ৰাজনাথ সিঙক হয়তো প্ৰতিৰক্ষাৰ মন্ত্ৰিত্ব দিয়া হ’ব। বৰ্তমানৰ প্ৰতিৰক্ষা মন্ত্ৰী নিৰ্মলা সীতাৰামনে সুষমা স্বৰাজৰ ঠাই ল’ব পাৰে।
জ্যেষ্ঠ মন্ত্ৰী ৰৱি শংকৰ প্ৰসাদ আৰু নীতীন গাদকাৰিক নতুন চৰকাৰৰ গুৰুত্বপূৰ্ণ দায়িত্ব দিয়াৰ সম্ভাৱনা আছে। বিজেপিত মুছলমানৰ জনাজাত মুখ মুখতাৰ আব্বাচ নকবিয়ে এইবাৰ কেবিনেট ৰেংক পোৱাৰ সম্ভাৱনা।
আন মন্ত্ৰী যেনে জে পি নাদ্দা, ধৰ্মেন্দ্ৰ প্ৰধান আৰু প্ৰকাশ জাৱাৰেকাৰ আদিকো গুৰুত্বপূৰ্ণ দায়িত্ব দিয়াৰ সম্ভাৱনা আছে, সূত্ৰটোৱে কয়।
