জম্মু-কাশ্মীৰৰ জম্মু জিলাস্থিত নিয়ন্ত্ৰণ ৰেখাত ভাৰতীয় সীমাত প্ৰৱেশ কৰিব বিচৰা তিনিজন উগ্ৰপন্থীক গুলীয়াই নিহত কৰে ভাৰতীয় সেনাই।
এই অভিযানত ভাৰতীয় সেনাৰ চাৰিজন জোৱান আহত হয় যদিও উগ্ৰপন্থীৰ দলটোৰ সকলো প্ৰয়াস বিফল কৰে।
এই কথা আজি সেনা বিভাগৰ পৰা জনোৱা হয়।
প্ৰতিৰক্ষা সূত্ৰত প্ৰকাশ পোৱা মতে, উগ্ৰপন্থীৰ দলটোৱে ভাৰতত যাতে অনায়াসে প্ৰৱেশ কৰিব পাৰে তাৰ বাবে পাকিস্তানৰ সেনাই মঙলবাৰৰ সন্ধিয়াৰ পৰাই নিয়ন্ত্ৰণ ৰেখাৰ অখনুৰ ছেক্টৰৰ খোৰ এলেকাত ধাৰাসাৰ গুলীবৰ্ষণ কৰে।
এটা সূত্ৰই কয়, ‘পাকিস্তানৰ সেনাই চলোৱা গুলীবৰ্ষণত চাৰিজন ভাৰতীয় সেনাই আঘাত পায়। ভাৰতেও ইয়াৰ প্ৰত্যুত্তৰ হিচাপে অভিযান চলোৱাত তিনিজন উগ্ৰপন্থী নিহত হয় আৰু ভাৰতত প্ৰৱেশ কৰিব বিচৰা তেওঁলোকৰ সকলো প্ৰয়াস বিফল হয়’।
সূত্ৰটোৱে লগতে কয় যে ভাৰতীয় সেনাৰ গুলীত নিহত হোৱা উগ্ৰপন্থী কেইজনৰ মৃতদেহ কেইটা পাকিস্তানৰ ফালৰ নিয়ন্ত্ৰণ ৰেখাতে পৰি আছে।
উল্লেখ্য যে ২০২১ বৰ্ষত পাকিস্তানৰ তৰফৰ পৰা যুদ্ধবিৰতি উলংঘন কৰা এইটো প্ৰথমটো ডাঙৰ ঘটনা।