ৰাজ্যত আজি তৃতীয় আৰু চতুৰ্থ বৰ্গৰ নিযুক্তি পৰীক্ষাৰ প্ৰথম পৰ্যায়ৰ পৰীক্ষা কঠোৰ নিৰাপত্তা ব্যৱস্থাৰ মাজৰে সম্পন্ন হোৱাৰ পিছত আজি পুনৰ দ্বিতীয় পৰ্যায়ৰ পৰীক্ষা অনুষ্ঠিত হ’ব৷ সেইমৰ্মে পৰীক্ষা ৰাজ্যৰ ২৫ খন জিলাত অনুষ্ঠিত কৰা হ’ব৷ ২১ আগষ্টত অনুষ্ঠিত পৰীক্ষাৰ সময়ত বহু ঠাইত বেমেজালিৰ সৃষ্টি হৈছিল৷ প্ৰৱেশ পত্ৰত থকা বিসংগতিৰ বাবে বহু কেন্দ্ৰত কিছু বেমেজালিৰ সৃষ্টি হোৱা দেখা যায়৷ বিশেষকৈ কোকৰাঝাৰৰ পৰীক্ষা কেন্দ্ৰত তেনে বেমেজালি দেখা গৈছিল৷
কোকৰাঝাৰ জিলাত পৰীক্ষাত অৱতীৰ্ণ হ’বলৈ অহা প্ৰায় শতাধিক পৰীক্ষাৰ্থীৰ এডমিট কাৰ্ডত পৰীক্ষা কেন্দ্ৰৰ ভুল ঠিকনা দিয়াত বিমোৰত পৰিবলগীয়া হৈছিল৷ গোসাইগাঁও মহকুমাৰ জাৰাগুৰীত পৰীক্ষা কেন্দ্ৰত অনুষ্ঠিত হ’বলগীয়া এডমিট কাৰ্ডত ভুলকৈ ডাকঘৰ ছালাকাটি বুলি উল্লেখ কৰাত অসুবিধাৰ সৃষ্টি হৈছিল৷
ৰাজ্য চৰকাৰে আজিও তৃতীয় আৰু চতুৰ্থ বৰ্গৰ চাকৰিৰ পৰীক্ষাৰ বাবে ৰাজ্যৰ ২৫ খন জিলাত বন্ধ কৰি দিয়ে ইণ্টাৰ নেট সেৱা৷
২১ আগষ্টৰ পুৱা দুঘন্টা আৰু আবেলি দুঘণ্টাৰ বাবে ইণ্টাৰনেট সেৱা কৰ্তন কৰা কৰাৰ কথা আছিল যদিও তাতোকৈও অধিক সময়ৰ বাবে মোবাইল ইন্টাৰনেট সেৱা বন্ধ হৈ থকাত অনলাইন ব্যৱসায়ত মাধমাৰ পৰিছিল৷ আজিও হয়তো তাৰ ব্যতিক্ৰম নঘটিব৷
পৰীক্ষাৰ দিনকেইটাত পুৱা ১০ বজাৰ পৰা দিনৰ ১২ বজালৈ আৰু দিনৰ ২ বজাৰ পৰা বিয়লি ৪ বজালৈ ইন্টাৰনেট সেৱা বন্ধ থাকিব বুলি চৰকাৰে পূৰ্বে ঘোষণা কৰিছিল৷
অসম চৰকাৰৰ তৃতীয় আৰু চতুৰ্থ বৰ্গৰ পৰীক্ষাৰ বাবে ম’বাইল ইণ্টাৰনেট সেৱা বন্ধ ৰখাৰ কথা ঘোষণা কৰিছিল মুখ্যমন্ত্ৰী হিমন্ত বিশ্ব শৰ্মাই।
বিভিন্ন বিভাগৰ নিযুক্তিৰ বাবে ইতিমধ্যে অনুষ্ঠিত পৰীক্ষাৰ প্ৰশ্নকাকত ফাদিলকে ধৰি অন্যান্য গাফিলতি ধৰা পৰাৰ পাছত এইবাৰ তৃতীয় আৰু চতুৰ্থ শ্ৰেণীৰ প্ৰায় ৩০ হাজাৰ পদত নিযুক্তিৰ বাবে অনুষ্ঠিত হোৱা পৰীক্ষাৰ বাবে পানী নসৰকা ব্যৱস্থা অৱলম্বন কৰে ৰাজ্য চৰকাৰে৷
২১, ২৮ আগষ্ট আৰু ১১ ছেপ্টেম্বৰত পৰীক্ষা অনুষ্ঠিত হোৱা আৰু হ’বলগীয়া কেন্দ্ৰসমূহত ম’বাইল, ইণ্টাৰনেট সেৱা কিছু ঘণ্টাৰ কাৰণে ব্যাহত কৰি ৰখাৰ দিহা কৰা হৈছে ৷ দিছপুৰত অসম আৰক্ষীৰ শীৰ্ষ পৰ্যায়ৰ বৈঠক অনুষ্ঠিত কৰাৰ পাছত পৰীক্ষাসমূহ সুচাৰুৰূপে পৰিচালিত কৰাৰ বাবে মুখ্যমন্ত্ৰী ড॰ হিমন্ত বিশ্ব শৰ্মাই জিলাৰ উপায়ুক্ত আৰু অন্যান্য অংশীদাৰীসকলৰ সৈতে ভাৰ্চুৱেল মাধ্যমৰ জৰিয়তে এক বৈঠকত মিলিত হৈছিল আৰু এই নিৰ্দেশ দিছিল৷
প্ৰতিখন জিলাত এজন ন’ডেল বিষয়া নিযুক্ত কৰাৰ ব্যৱস্থা কৰা হৈছে । লগতে সকলো ব্যৱস্থা সঠিকভাৱে ৰূপায়ণ কৰাটো নিশ্চিত কৰিবলৈ প্ৰতিটো পৰীক্ষা কেন্দ্ৰত ৰাজপত্ৰিত বিষয়াসকলক পৰ্যবেক্ষক হিচাপে নিযুক্তি দিয়া হৈছে ।প্ৰতিটো পৰীক্ষা কেন্দ্ৰত এজন উপ-পৰিদৰ্শক পৰ্যায়ৰ আৰক্ষী বিষয়া নিয়োজিত কৰাৰ ব্যৱস্থা কৰা হৈছে । আনহাতে প্ৰাৰ্থীসকলৰ লগতে ইনভিজিলেটৰসকলক পৰীক্ষা কেন্দ্ৰলৈ মোবাইল ফোন বা আন যিকোনো ইলেক্ট্ৰনিক গেজেট কঢ়িওৱাৰ ক্ষেত্ৰত বাধা নিষেধ আৰোপ কৰা হৈছে ।
প্ৰতিটো পৰীক্ষা কেন্দ্ৰৰ ভাৰপ্ৰাপ্ত বিষয়াই পৰীক্ষা প্ৰক্ৰিয়াৰ ভিডিঅ’গ্ৰাফী কৰিবলৈ দুজন ভিডিঅ’গ্ৰাফাৰ নিয়োজিত কৰিবলৈ নিৰ্দেশ দিয়া হৈছে । পৰীক্ষাত কিবা খেলিমেলি হ’লে সংশ্লিষ্ট জিলাখনৰ উপায়ুক্তগৰাকী দায়বদ্ধ হ’ব বুলি কোৱা হৈছে ।
