গামোচা লৈ দিল্লীৰ ৰাজপথত প্ৰতিবাদ উত্তৰ-পূবৰ যুৱ কংগ্ৰেছীৰ

নতুন দিল্লীৰ ৰাজপথত অসম তথা উত্তৰ পূৰ্বাঞ্চলৰ যুৱ কংগ্ৰেছীসকলে বৃ্হস্পতিবাৰে বিজেপি চৰকাৰৰ “অসম তথা উত্তৰ-পূব ভাৰত বিৰোধী” ভূমিকাৰ প্ৰতিবাদত এক প্ৰতিবাদী শোভাযাত্ৰা উলিয়াই নাগৰিকত্ব সংশোধনী বিধেয়ক ২০১৬খন “জাপি” দিয়াৰ বিৰুদ্ধে প্ৰতিবাদ সাব্যস্ত কৰে।

কেন্দ্ৰৰ বিজেপি শাসিত চৰকাৰে “এই অঞ্চলৰ জনসাধাৰণৰ ভৱিষ্যতলৈ শংকা নমাই অনা” কাৰ্য্যৰ প্ৰতিবাদ জনাবলৈ উত্তৰ পূৰ্বাঞ্চলৰ আটাইকেইখন ৰাজ্যৰ যুৱ কংগ্ৰেছৰ প্ৰতিনিধিসকলে নিখিল ভাৰত কংগ্ৰেছ কমিটিৰ মুখ্য কাৰ্য্যআলয়, দিল্লীস্থিত ২৪ আকবৰ ৰোডৰ পৰা দিনৰ ভাগত উলিওৱা প্ৰতিবাদী শোভাযাত্ৰাই কেন্দ্ৰীয় গৃহ মন্ত্ৰীৰ বাসভৱনলৈ গতি কৰাৰ সময়ত আৰক্ষীয়ে শোভাযাত্ৰাকাৰী দলটোক মাজবাটতে আবদ্ধ কৰি ৰখাই আটক কৰে।

প্ৰতিবাদকাৰীসকলে কেন্দ্ৰীয় গৃহমন্ত্ৰীৰ বাসভৱনৰ সন্মুখত প্ৰতিবাদ সাব্যস্ত কৰি কয় যে বিধেয়কখনে অসম তথা উত্তৰ-পূবৰ জনসাধাৰণৰ জীৱনলৈ শংকা নমাই অনাৰ লগতে নিজ নিজ ভাষা, সংস্কৃতিলৈকো ভাবুকি নমাই আনিব।

অসম প্ৰদেশ যুৱ কংগ্ৰেছৰ মিডিয়া সমন্বয়ক কৃদীপ বৰ্মণে এক বিবৃতি যোগে জনোৱা মতে নাগৰিকত্ব সংশোধনী বিধেয়ক ২০১৬ প্ৰত্যাহাৰৰ দাবীত  “SAVE NORTH EAST – SAVE INDIA” ৰ উপৰিও বিভিন্ন শ্ল’গান দিয়াৰ লগতে অসমীয়াৰ স্বাভিমানৰ প্ৰতীক গামোচা প্ৰদৰ্শন কৰি প্ৰতিবাদ সাব্যস্ত কৰা হয়।

অসম, মেঘালয়, অৰুণাচল প্ৰদেশ, মণিপুৰ, নাগালেন্দ, ত্ৰিপুৰা, মিজোৰামৰ প্ৰদেশ যুৱ কংগ্ৰেছ সভাপতিসকল ক্ৰমে কমৰুল ইছলাম চৌধুৰী, ৰিচাৰ্দ এম মাৰাক, গেলি ইটে, আমিৰ হুচেইন, এবি কেংগ্ৰুচই, শুচান্ত চক্ৰৱৰ্তী, ড° লালমালচাওমনৰ নেতৃত্বত প্ৰায় চাৰিশ সদস্যই অংশগ্ৰহণ কৰে প্ৰতিবাদত।

সৰ্বভাৰতীয় যুৱ কংগ্ৰেছৰ সভাপতি কেশৱ চন্দ যাদৱ, উপ সভাপতি শ্ৰীনিবাস বি. ভেংকটেশৰ, সম্পাদক তথা প্ৰদেশ যুৱ কংগ্ৰেছৰ তত্বাবধায়ক ড° স্মুতি ৰঞ্জন লেংকা আৰু অসম প্ৰদেশ কংগ্ৰছৰ জ্যেষ্ঠ মুখপাত্ৰ অপূৰ্ব ভট্টাচাৰ্য, সম্পাদক ইমদাদ হুছেইন, অসম প্ৰদেশ যুৱ কংগ্ৰেছৰ প্ৰাক্তন সভাপতি, বিধায়ক ৰেকীবুদ্দিন হুছেইনে প্ৰতিবাদী সকলক সম্বোধন কৰে।