কংগ্ৰেছত অপ্ৰতিৰোধ্য খহনীয়াঃ ৫০০০ কৰ্মীয়ে এৰিব হাতৰ সংগ

সংকটত পৰিছে গান্ধী পৰিয়াল।কংগ্ৰেছৰ বাহিৰত এতিয়া চলিছে আজাদৰ যাদু৷গুলাম নবী আজাদে কংগ্ৰেছৰ পৰা পদত্যাগ কৰাৰ পিছত এটা নতুন দল গঠনৰ কথা ঘোষণা কৰাৰ পিছতে এতিয়া হাজাৰ হাজাৰ কংগ্ৰেছ নেতা-কৰ্মীয়ে কংগ্ৰেছ ত্যাগ কৰি আজাদৰ লগ লাগিবলৈ উথপথপ লগাইছে৷ এতিয়ালৈকে জম্মু আৰু কাশ্মীৰত শ শ কংগ্ৰেছ নেতাই দল ত্যাগ কৰিছে৷ ইয়াৰ উপৰিও গুলাম নবী আজাদৰ সমৰ্থনত ৫,০০০ কৰ্মীয়েও কংগ্ৰেছ ত্যাগ কৰিবলৈ সাজু হৈছে বুলি জানিব পৰা গৈছে। কংগ্ৰেছৰ এই ক্ষতি হিমাচল আৰু হাৰিয়ানালৈ বিয়পি পৰিছে।

এফালে ভূপিন্দৰ সিং হুদাৰ গুলাম নবী আজাদৰ সৈতে হোৱা বৈঠকে হাৰিয়ানা কংগ্ৰেছত জোকাৰণিৰ সৃষ্টি কৰিছে, আনহাতে হিমাচলতো আনন্দ শৰ্মাৰ ‘আজাদ যাদুৰ’ৰ ক্ৰিয়া দেখা গৈছে। বুধবাৰে কংগ্ৰেছে পুৰণি পেঞ্চন আঁচনি পুনৰুদ্ধাৰকে ধৰি ১০ টা গেৰাণ্টি ঘোষণা কৰাৰ সময়তো কৰ্মীসকলৰ পৰা বিশেষ সঁহাৰি লাভ নকৰিলে। কংগ্ৰেছৰ এই অভিযানৰ সময়ত আনন্দ শৰ্মাৰ দৰে নেতাসকল অনুপস্থিত আছিল।

আনন্দ শৰ্মাই হিমাচল প্ৰদেশ কংগ্ৰেছৰ নিৰ্বাচনী প্ৰচাৰ সমিতিৰ অধ্যক্ষ পদৰ পৰাও পদত্যাগ কৰিছে। এনে পৰিস্থিতিত, তেওঁৰ অনুপস্থিতিয়ে দলটোক অধিক ক্ষতিগ্ৰস্ত কৰাৰ সম্ভাৱনা আছে।গুলাম নবী আজাদৰ প্ৰভাৱৰ বাবে হাৰিয়ানাতো নতুন জল্পনা-কল্পনা আৰম্ভ হৈছে। সোমবাৰে গুলাম নবী আজাদক সাক্ষাৎ কৰা নেতাসকলৰ ভিতৰত আনন্দ শৰ্মা, ভূপিন্দৰ সিং হুডা আৰু পৃথ্বীৰাজ চৱন অন্যতম আছিল।

এতিয়া হাৰিয়ানাৰ জ্যেষ্ঠ কংগ্ৰেছ নেতা কুমাৰী চেলজাই ভূপিন্দৰ সিং হুডাৰ বিৰুদ্দে হাইকমাণ্ডে ব্যৱস্থা লোৱা উচিত বুলি মন্তব্য কৰিছে৷ শেহতীয়াকৈ হুডাৰ ঘনিষ্ঠ সহযোগী উদয়ভানক ৰাজ্যিক সভাপতি হিচাপে নিযুক্তি দিয়াৰ পিছত হাইকমাণ্ডে ভাবিছিল যে এতিয়া হাৰিয়ানাত কংগ্ৰেছত বিসম্বাদৰ সমাপ্তি ঘটিব। কিন্তু তেনে হোৱা নাই৷ হুডা দুবাৰ হাৰিয়ানাৰ মুখ্যমন্ত্ৰী আছিল আৰু জাট সকলৰ মাজত তেওঁ বেছ জনপ্ৰিয়।