মঙলবাৰে মাজ নিশা হিমাচল প্ৰদেশৰ এখন হাস্পতালত ক’ৰ’নাত আক্ৰান্ত এগৰাকী ৫৪ বছৰীয়া মহিলাই ফাঁচি লগাই আত্মহত্যা কৰা ঘটনাই ৰাজ্যখনত চাঞ্চল্যৰ সৃষ্টি কৰিছে।
মহিলা গৰাকী যোৱা সপ্তাহত ক’ভিড-১৯ত আক্ৰান্ত হৈছিল।
ঘটনা সন্দৰ্ভত আৰক্ষী অধীক্ষক মোহিত চাওলাই কয় যে ক’ভিড-১৯ত আক্ৰান্ত হোৱাৰ পিছত যোৱা ১৮ চেপ্তেম্বৰত মহিলা গৰাকীক দীন দয়াল হাস্পতালত ভৰ্তি কৰোৱা হৈছিল।
মহিলা গৰাকীয়ে মঙলবাৰে নিশা ১২ বাজি ১০ মিনিটত হাস্পতালৰ লোহাৰ গ্ৰীলত ফাঁচি লগোৱা বুলি আৰক্ষী অধীক্ষক চাওলাই জনায়।
আৰক্ষীৰ লোকে মহিলা গৰাকীৰ মৃত্যুৰ প্ৰকৃত ৰহস্য উদঘাটনৰ বাবে তদন্ত আৰম্ভ কৰিছে। অৱশ্যে এই পৰ্যন্ত মৃত মহিলা গৰাকীৰ মৰণোত্তৰ পৰীক্ষা সম্পন্ন হোৱা নাই বুলি জানিব পৰা গৈছে।
আনহাতে এগৰাকী বিষয়াই জানিবলৈ দিয়া মতে, মহিলা গৰাকীৰ আত্মহত্যাৰ ঘটনা সন্দৰ্ভত চিমলাৰ উপায়ুক্ত ঔমপতি জামৱালক অৱগত কৰি দণ্ডাধীশ পৰ্যায়ৰ তদন্তৰ দাবী জনাইছে।
