অসম আৰু অৰুণাচলৰ মুঠ ৬৩টা হাতী বৰ্তমান তামিলনাডুৰ মন্দিৰ তথা ব্যক্তিগত লোকৰ জিম্মাত আছে।
মাদ্ৰাছ উচ্চ ন্যায়ালয়ত বনবিভাগে দাখিল কৰা এক শপতনামা অনুসৰি, মুঠ ১২৭টা হাতী তামিলনাডুত আছে আৰু ইয়াৰে ৩১টা মন্দিৰসমূহত ৰখা হৈছে, ৩২টা ব্যক্তিগত লোকৰ তাত আছে আৰু ৬৪টা বিভাগৰ বিশেষ শিৱিৰত আছে।
বিভাগে আদালতক কৈছিল যে তামিলনাডুৰ বিভিন্ন মন্দিৰত প্ৰতিপালিত হৈ থকা বহু হাতীৰ অনুজ্ঞাপত্ৰ অসম আৰু কেৰেলাত বসবাস কৰা ব্যক্তিৰ নামত আছে।
বন বিভাগৰ বিষয়াই জানিবলৈ দিছিল যে মাদুৰাইৰ তিৰুপ্পাৰনকুন্দ্ৰম সুব্ৰমনিয়া স্বামী মন্দিৰত থকা প্ৰেৰণা নামৰ ১৫ বছৰীয়া মাইকী হাতীটোৰ অনুজ্ঞাপত্ৰ লীলা বৰা নামৰ ব্যক্তিৰ নামত আছে।
একেদৰে, মাদুৰাইৰ কাল্লাজাহগৰ মন্দিৰত ৰখা জোন ওৰফে সুন্দৰাৱল্লী নামৰ ১৪ বছৰীয়া মাইকী হাতীটোৰ অনুজ্ঞাপত্ৰ অসমৰ প্ৰদীপ দলেৰ নামত থকাৰ উপৰি তিৰুচিৰ তিৰুভনাইকাভালৰ জাম্বুকেশৱাৰাৰ অকিলেন্দেশ্বৰী মন্দিৰত থকা মনি ওৰফে একিলা নামৰ ১৮বছৰীয়া হাতীটোৰ অনুজ্ঞাপত্ৰ আছে চন্দ্ৰকান্ত হাজৰিকাৰ নামত।
বন বিভাগৰ মতে ভিৰুধুনগৰপ শ্ৰীভিল্লীপুত্তৰ অন্দল মন্দিৰত জয়মালা ওৰফে জয়ামালয়থা নামৰ ১৮ বছৰীয়া মাইকী হাতীটোৰ অনুজ্ঞাপ্তৰ অসমৰ গিৰিন মৰানৰ নামত থকাৰ লগতে তিৰুকাদায়ুৰ অমৃথাদাদেশ্বৰাৰ স্বামী দেৱস্থানমত থকা ভাগ্যৱতী ওৰফে অবিৰামি নামৰ ১৪ বছৰীয়া মাইকী হাতীটোৰ অনুজ্ঞাপত্ৰ আছে তুলেশ্বৰ মৰানৰ নামত।
চৰকাৰী অধিবক্তা চি হৰ্ষ ৰাজে আদালতক জনাইছিল যে চলিত মাহৰ প্ৰথম ভাগত আদালতে দিয়া নিৰ্দেশ অনুসৰি বিভাগে ৰাজ্যখনৰ জিম্মাত থকা প্ৰতিটো ব্যক্তিগত হাতীৰে বংশাৱলীকে ধৰি সকলো ব্যক্তিগত বিশদ তথ্য সূচীবদ্ধ কৰিবলৈ আৰম্ভ কৰিছে আৰু প্ৰক্ৰিয়াটো সম্পূৰ্ণ কৰি বিশদ দাখিল কৰিবলৈ বিভাগক আৰু এমাহ সময় লাগিব।
ইপিনে, নতুন দিল্লীস্থিত পশু সুৰক্ষা সংগঠন এলছা ফাউণ্ডেছনৰ সহ প্ৰতিষ্ঠাপক প্ৰকাশ ছাছাই কয় যে ৰাজ্যৰ বন বিভাগে ২০১৯চনৰ জানুৱাৰীত কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰ্যালয়ত দাখিল কৰা ইয়াৰ প্ৰতিবেদনত দাবী কৰিছিল যে মন্দিৰসমূহত আৰু ব্যক্তিগত লোকৰ জিম্মাত ৮৬টা হাতী আছে।
আনহাতে, এতিয়া মন্দিৰসমূহত তথা ব্যক্তিগত লোকৰ জিম্মাত মাত্ৰ ৬৩হাতীহে থকা বুলি কোৱা হৈছে।
তেওঁ কয় যে বন বিভাগে ২০১৯চনৰ পৰা এক বৃহৎ সংখ্যক ২৩ টা হাতী কেনেকৈ নোহোৱা হ’ল সেই সংখ্যাৰ খেলিমেলিৰ ব্যাখ্যা দিবই লাগিব।
তেওঁৰ ভাষ্য লিপিবদ্ধ কৰাৰ পাছত ন্যায়াধীশে বিগত পাঁচ বছৰত ৰাজ্যখনত হাতীৰ সংখ্যা আৰু হাতীৰ সৈতে সম্পৰ্কিত আন সামগ্ৰী সম্পৰ্কত কেন্দ্ৰীয় মন্ত্ৰ্যালয়ক দিয়া তথ্যসমূহ অহা ২১ অক্টোবৰৰ ভিতৰত দাখিল কৰিবলৈ বন বিভাগত নিৰ্দেশ দিছে।
মন্দিৰসমূহৰ জিম্মাত থকা হাতীসমূহক ভালকৈ চোৱাচিতা কৰা সম্পৰ্কত গুৰুত্ব আৰোপ কৰা কৰ্মী ৰংগৰাজন নৰসিংহনে দাখিল কৰা এক ৰাজহুৱা স্বাৰ্থজড়িত আবেদনৰ ওপৰত এই অন্তৱৰ্তী নিৰ্দেশ দিয়া হয়।
