নিমন্ত্ৰণ ৰক্ষা কৰি এখন বিবাহৰ আতিথ্য গ্ৰহণ কৰিবলৈ গৈ অথন্তৰৰ সন্মুখীন হ’বলগীয়া হৈছে নিমন্ত্ৰিত অতিথি। বিবাহত আহাৰৰ লগত দিয়া ৰসগোল্লা খাই চিকিৎসালয়ত ভৰ্তি হ’ল ৭০ গৰাকীকৈ লোক। উত্তৰ প্ৰদেশৰ কনৌজত সংঘটিত হৈছে এই ঘটনা।
কনৌজৰ এখন গাঁৱত বিয়াৰ ভোজত খাদ্য গ্ৰহণ কৰি অসুস্থ হৈ পৰা কেইবাগৰাকীও শিশুসহ প্ৰায় ৭০ গৰাকী লোকক চিকিৎসালয়ত ভৰ্তি কৰা হৈছে বুলি স্থানীয় এগৰাকী জ্যেষ্ঠ বিষয়াই সংবাদ মাধ্যমৰ আগত অৱগত কৰে।
বিষয়াগৰাকীয়ে জানিবলৈ দিয়া মতে, মঙলবাৰে সন্ধিয়া মাধৰপুৰ নামৰ এখন গাঁৱত অনুষ্ঠিত হৈছিল এই বিবাহ অনুষ্ঠান। নিমন্ত্ৰিত অতিথিসকলে খাদ্য গ্ৰহণ কৰাৰ পাছতে অস্বাভাৱিক ধৰণে অসুস্থ হৈ পৰে।
খাদ্য গ্ৰহণ কৰা প্ৰায় ২০০ গৰাকী লোকৰ ভিতৰত প্ৰায় ৭০ গৰাকী লোকে খাদ্যৰ লগত পৰিবেশন কৰা ‘ৰসগোলা’ খোৱাৰ পিছতে বমি আৰু ডায়েৰিয়াৰ লক্ষণৰ সন্মুখীন হয়।
লগে লগে অসুস্থ লোকসকলক জিলা চিকিৎসালয়ত ভৰ্তি কৰাৰ লগতে আন একাংশ লোকক ব্যক্তিগত চিকিৎসালয়লৈ লৈ যোৱা হয় বুলি বিষয়াগৰাকীয়ে উল্লেখ কৰে৷ অৱশ্যে সম্প্ৰতি আটাইকেইগৰাকী লোকেই সুস্থ বুলি তেওঁ লগতে সদৰী কৰে।
