সাগৰৰ পাৰত সিঁচৰতি হৈ আছে শ শ ডলফিন আৰু তিমিৰ মৃতদেহ। তেজৰ ৰঙত ৰঙা হৈ পৰিছে সাগৰৰ পানী। এনে এক ভয়ানক দৃশ্য চাবলৈ ডাঙৰৰ লগতে সৰু ল’ৰা-ছোৱালীয়েও ভিৰ কৰিছে। অসহায় প্ৰাণীবিলাকক ছুৰীৰে কাটি মৰা দেখি একাংশ মানুহে বিকৃতভাৱে উল্লাস কৰিছে। হাজাৰ বছৰ পুৰণি পৰম্পৰা পালনৰ নামত ডেনমাৰ্কৰ ফাৰো দ্বীপত পুনৰ এই নিষ্ঠুৰ দৃশ্য দেখিবলৈ পোৱা গৈছে। ভাইকিং যুগৰ ‘দ্য গ্ৰাইণ্ড’ নামৰ এই উৎসৱৰ ছবি পোহৰলৈ অহাৰ লগে লগে সমগ্ৰ বিশ্বতে ইয়াৰ তীব্ৰ নিন্দা কৰা হৈছে। এই হত্যাক অতি সোনকালে বন্ধ কৰিবলৈ চৰকাৰক আহ্বান জনোৱা হৈছে।
জানিব পৰা মতে, যোৱা ২৭ মে’ তাৰিখে ফাৰো দ্বীপত মৃত্যুৰ এই ভয়ানক উৎসৱ পালন কৰা হৈছিল। ‘দ্য গ্ৰাইণ্ড’ৰ সময়ত সাগৰৰ পৰা প্ৰায় ৭০০ তিমি আৰু ডলফিন জালৰ সহায়ত নাৱেৰে পাৰলৈ টানি অনা হয়। এই হত্যাকাণ্ড চাবলৈ সাগৰৰ পাৰত বিপুল সংখ্যক মানুহ গোট খায়। ইয়াৰ পিছত এদল মানুহে হাতত ছুৰী লৈ অগভীৰ পানীলৈ নামি যায় আৰু জীৱন্ত অৱস্থাতে প্ৰাণীবিলাকক টুকুৰা-টুকুৰকৈ কাটি পেলায়। এই নিষ্ঠুৰ হত্যাৰ ফলত সাগৰৰ পানী তেজৰে ৰঙা হৈ পৰে আৰু সাগৰৰ পাৰত মৃত প্ৰাণীবোৰৰ দেহ পৰি থাকে। এই ভয়ংকৰ দৃশ্য ছচিয়েল মিডিয়াত বিয়পি পৰাৰ লগে লগে সমগ্ৰ বিশ্বজুৰি প্ৰতিক্ৰিয়াৰ সৃষ্টি হৈছে।
সাগৰীয় জীৱ সংৰক্ষণৰ বাবে কাম কৰা স্বেচ্ছাসেৱী সংস্থা ‘চি শ্বেফাৰ্ড’ৰ সঞ্চালক ভেলেণ্টিনা ক্ৰাষ্টে কয় যে তেওঁ এই ভয়ানক অনুষ্ঠান বন্ধ কৰিবলৈ ইউৰোপৰ চৰকাৰবোৰক বহুবাৰ অনুৰোধ জনাইছে। কিন্তু এই পুৰণি প্ৰথা বন্ধ কৰাৰ কোনো ব্যৱস্থা এতিয়ালৈকে লোৱা হোৱা নাই। জীৱ-জন্তুৰ অধিকাৰৰ বাবে কাম কৰা সংস্থা ‘পেটা’ৰ সভানেত্ৰী এলিছা এলেনে কয় যে এয়া এক ভয়ংকৰ নিষ্ঠুৰতাৰ উৎসৱ। এই প্ৰাণীবিলাকে নিজৰ পৰিয়ালৰ সৈতে সাগৰত ঘূৰি ফুৰে আৰু উৎসৱৰ নামত সিহঁতৰ গোটেই পৰিয়ালটোক অতি নিষ্ঠুৰভাৱে হত্যা কৰা হয়। অৱশ্যে ফাৰো দ্বীপপুঞ্জৰ প্ৰশাসনে দাবী কৰিছে যে এই উৎসৱৰ সময়ত পৰিৱেশৰ দিশটোক যথেষ্ট গুৰুত্ব দিয়া হয়। তেওঁলোকৰ মতে, উত্তৰ আটলাণ্টিক মহাসাগৰত ডলফিন আৰু তিমিৰ সংখ্যা যথেষ্ট পৰিমাণে আছে।
প্ৰতিবেদন অনুসৰি, উৎসৱৰ সময়ত স্কটলেণ্ডৰ পৰা ২০০ মাইল দূৰত থকা টৰ্চভনত ৪০২ টা পাইলট তিমি হত্যা কৰা হৈছে। স্কালাবোটনুৰত ১৬৮ টা আৰু হাভালভিকত ১৩২ টা একে প্ৰজাতিৰ ডলফিন মৰা হৈছে। সকলো মিলি এই হত্যাযজ্ঞত ৭০৬ টা নিৰীহ প্ৰাণীৰ প্ৰাণ গৈছে। উল্লেখ্য যে, ফাৰো দ্বীপপুঞ্জৰ এই মৃত্যুৰ উৎসৱ হাজাৰ বছৰৰ আগৰ ভাইকিং যুগৰ পৰাই চলি আহিছে। স্বেচ্ছাসেৱীসকলৰ মতে, বৰ্তমান যুগত এনেকুৱা উৎসৱ পালন কৰাৰ কোনো প্ৰয়োজন নাই। আনহাতে, ফাৰো দ্বীপপুঞ্জৰ সংসদে নিজৰ প্ৰাণী সুৰক্ষা আইন সলনি কৰি ডলফিন সংৰক্ষণৰ নিয়ম বাতিল কৰিছে। যাৰ ফলত প্ৰতি বছৰে এনেদৰে হাজাৰ হাজাৰ ডলফিন আৰু তিমিয়ে নিজৰ প্ৰাণ হেৰুৱাবলগীয়া হৈছে।
