নগাঁও জিলাৰ আটাইকেইজন বিধায়কেই তেওঁ লোকৰ বিধায়ক এলেকা উন্নয়ন পুঁজিৰ লাখ লাখ টকা ব্যয় কৰাত ব্যৰ্থ হৈছে।
আৰ টি আই তথ্যৰ জৰিয়তে এই কথা পোহৰলৈ আনিছে ইনফৰমেচন ফ’ৰামৰ সম্পাদক নৰেন্দ্ৰ প্ৰকাশ চৌহানে।
আৰ টি আই কৰ্মী তথা ইনফৰমেচন ফ’ৰামৰ সম্পাদক নৰেন্দ্ৰ প্ৰকাশ চৌহানৰ আৰ টি আই আবেদনৰ ভিত্তিত নগাঁৱৰ জ্যেষ্ঠ পৰিকল্পনা বিষয়াই যোৱা ৩-১২-২০২০তাৰিখৰ এন ডি চি (আৰ টি আই)৪৬/২০১৬/২৮৫ মৰ্মে যোগান ধৰা তথ্যত প্ৰকাশ পোৱা অনুসৰি, জিলা খনৰ ধিং, বটদ্ৰৱা,ৰূপহীহাট, নগাঁও সদৰ, বঢ়মপুৰ, চামগুৰি আৰু কলিয়াবৰ বিধানসভা সমষ্টিৰ প্ৰতিজন বিধায়কেই ২০১৭-২০১৮,২০১৮-২০১৯ আৰু ২০১৯-২০২০ বিত্তীয় বৰ্ষত প্ৰতিটো বৰ্ষতে এক কোটি টকাকৈ বিধায়ক এলেকা উন্নয়ন পুঁজিৰ বাবদ লাভ কৰিছিল।
কিন্তু ২০১৭-২০১৯বৰ্ষত কেৱল ধিং আৰু কলিয়াবৰ সমষ্টিৰ বিধায়ক দুজনেহে সম্পূৰ্ণ এক কোটি টকা খৰচ কৰিবলৈ সক্ষম হয়।
বৰ্ষটোত সাত জন বিধায়কে খৰচ নকৰাকৈ পেলাই থোৱা ধনৰ পৰিমান ২৮.৫লাখ টকা। সেই বৰ্ষটোত ৰহা সমষ্টিৰ বিধায়ক জনে ৮.৫লাখ টকা, বটদ্ৰৱা সমষ্টিৰ বিধায়কে দুই লাখ টকা,ৰূপহীহাট সমষ্টিৰ বিধায়কে ২.৩৭৫লাখ টকা, নগাঁও সদৰ সমষ্টিৰ বিধায়কে ৪.৩৭৫লাখ টকা, বঢ়মপুৰ সমষ্টিৰ বিধায়কে ১০.১২৫লাখ টকা আৰু চামগুৰি সমষ্টিৰ বিধায়কে ১.১২৫ লাখ টকা খৰচ কৰাত ব্যৰ্থ হয়।
আনহাতে,২০১৮-২০১৯বিত্তীয় বৰ্ষত জিলা খনৰ আঠ জন বিধায়কে খৰচ নকৰাকৈ পেলাই থোৱা ধনৰ পৰিমান আছিল ১৬৩.০৩৫লাখ টকা।
জিলা উন্নয়ন আৰু পৰিকল্পনা বিভাগৰ তথ্য অনুসৰি,২০১৮-২০১৯ বিত্তীয় বৰ্ষটোত জিলা খনৰ ৰহা সমষ্টিৰ বিধায়ক জনে ২৫লাখ টকা,ধিং সমষ্টিৰ বিধায়কে ১১.০৬৫ লাখ টকা, বটদ্ৰৱা সমষ্টিৰ বিধায়িকা গৰাকীয়ে ২৫লাখ টকা,ৰূপহীহাট সমষ্টিৰ বিধায়কে ২৩.২৫ লাখ টকা, নগাঁও সদৰ সমষ্টিৰ বিধায়কে ২৫.৪৭লাখ টকা, বঢ়মপুৰ সমষ্টিৰ বিধায়কে ২৫লাখ টকা চামগুৰি সমষ্টিৰ বিধায়কে ৩.২৫লাখ টকা আৰু কলিয়াবৰ সমষ্টিৰ বিধায়কে ২৫লাখ টকা খৰচ কৰাত ব্যৰ্থ হয়।
ঠিক একেদৰে,২০১৯-২০২০বিত্তীয় বৰ্ষটোত জিলা খনৰ ৰহা সমষ্টিৰ বিধায়কে ২৮ লাখ টকা,ধিং সমষ্টিৰ বিধায়কে ৫৪.৮৮৭৩ লাখ টকা, বটদ্ৰৱা সমষ্টিৰ বিধায়কে ২৫ লাখ টকা,ৰূপহীহাট সমষ্টিৰ বিধায়কে ২৬.২৫ লাখ টকা, নগাঁও সদৰ সমষ্টিৰ বিধায়কে ৫২ লাখ টকা, বঢ়মপুৰ সমষ্টিৰ বিধায়কে ৮৮.২২৫ লাখ টকা, চামগুৰি সমষ্টিৰ বিধায়কে ১৯.২৫ লাখ টকা, কলিয়াবৰ সমষ্টিৰ বিধায়কে ৭৪ .৮৭৮লাখ টকা খৰচ কৰাত ব্যৰ্থ হোৱা বুলি আৰ টি আই তথ্যত উল্লেখ আছে।
বিত্তীয় বৰ্ষটোত জিলা খনৰ আঠটা সমষ্টিৰ বিধায়কে খৰচ নকৰাকৈ পেলাই থোৱা ধনৰ পৰিমাণ ৩৪০.৪৮৭৫ লাখ টকা।
জিলা খনৰ বিধায়ক সকলে বিধায়ক এলেকা উন্নয়ন পুঁজিৰ ধনো সম্পূৰ্ণ ৰূপে খৰচ কৰিবলৈ সক্ষম নোহোৱাটো অত্যন্ত পৰিতাপৰ বিষয় হিচাপে বিবেচিত হৈছে।