এক ভয়ংকৰ তথ্য প্ৰকাশ কৰিছে কেন্দ্ৰীয় চৰকাৰৰ অধীনস্থ সংস্থা ‘চেন্ট্রেল ড্ৰাগছ কন্ট্র’ল অর্গেনাইজেচনে’। সংস্থাটোৰ মতে দেশত প্ৰচলন হৈ থকা বহু জীৱদায়িনী ঔষধৰে নাই গুণগত মান। সংস্থাটোৰ মতে ৮৪ বিধ ঔষধৰ গুণগত মান কেৱল নিম্নই নহয়, সেই ঔষধবোৰ অতি বিপদজ্জনকো।
সংস্থাটোৰ প্ৰতিবেদন মতে এই ঔষধবোৰ মানৱ শৰীৰৰ বাবে নিৰাপদ নহয় বুলিও প্ৰমাণিত হৈছে। সংস্থাটোৱে কৰা গুণগত মানৰ পৰীক্ষাত এই ঔষধসমূহ বিপদজ্জনক বুলি প্ৰমাণিত হৈছে।
বিভিন্ন বিষৰ লগতে এচিডিটি, কলেষ্টেৰল, ডায়েবেটিছৰ দৰে নিয়ন্ত্রণ বা নিৰাময়ত আৰু সাধাৰণ ষ্টেৰইড হিচাপে ব্যৱহাৰ হৈ থকা বহুবোৰ ঔষধ নিৰাপদ নহয় বুলিও প্রমাণিত হৈছে। ঔষধৰ গুণগত মানৰ পৰীক্ষা সম্পন্ন হোৱাৰ পিচত কেন্দ্রীয় ঔষধ নিয়ন্ত্রক সংস্থাটোৱে এচিডিটি, কলেষ্টেৰল আৰু মধুমেহ ৰোগৰ ৮৪ বিধ ঔষধক বিপজ্জনক বুলি চিহ্নিত কৰিছে।
প্ৰতিবেদনত স্পষ্টভাৱে কোৱা হৈছে যে এচিডিটি, কলেষ্টেৰল, বহুমূত্ৰ আৰু জীৱাণুজনিত ৰোগৰ নিৰাময় বা নিয়ন্ত্ৰণত ব্যৱহাৰ হোৱা ৮৪ বিধ ঔষধ নিৰাপদ নহয়। এই ঔষধসমূহৰ গুণগত মান অতি বেয়া আৰু এইসমূহ ৰোগীৰ স্বাস্থ্যৰ বাবে বিপজ্জনক। কিন্তু এই ৮৪ বিধ ঔষধৰ তালিকাত কি কি কোম্পানীৰ ঔষধ আছে, সেয়া সংস্থাটোরে প্রকাশ কৰা নাই।
উল্লেখ্য যে বিভিন্ন ৰোগ নিয়ন্ত্রণ, নিৰাময় আদিৰ বাবে বজাৰত বিক্ৰী হোৱা ঔষধসমূহৰ নিয়মীয়া পৰীক্ষা কৰে চি ডি এছ চি অ’ৱে। প্ৰতিবছৰে পৰীক্ষা কৰা এই সংস্থাটোৱে বিগত বৰ্ষত ৫৩ বিধ ঔষধৰ গুণগত মান নিম্ন বুলি সদৰী কৰিছিল।
সংস্থাটোৰ এইবাৰৰ পৰীক্ষাত বিগত বৰ্ষতকৈ অধিক ঔষধ মানৱ শৰীৰৰ বাবে বিপদজ্জনক বুলি প্ৰমাণিত হোৱাৰ কথাই চিন্তান্বিত কৰি তুলিছে ৰোগীসকলক। লগতে এই তথ্যই ঔষধ প্ৰস্তুত কৰা প্ৰতিষ্ঠানসমূহে ৰোগীৰ জীৱনৰ লগত হেতালি খেলাটো একপ্ৰকাৰে প্ৰমাণিত হৈছে। যিটো অতি ভয়ংকৰ কথা ৰূপে বিবেচিত হৈছে।
ইপিনে, এই ঔষধসমূহ বিপদজ্জনক বুলি প্ৰমাণ হোৱাৰ পাছতে সংস্থাটোৱে ঔষধসমূহক অতি ক্ষিপ্ৰতাৰে বজাৰৰ পৰা প্ৰত্যাহাৰ কৰিবলৈ নিৰ্দেশ জাৰি কৰিছে। লগতে এনে ৰপ্তানিকৃত ঔষধসমূহৰ ওপৰত নিষেধাজ্ঞা আৰোপ কৰিছে।
চি ডি এছ চি অ’-এ এই ঔষধসমূহ বজাৰৰ পৰা প্ৰত্যাহাৰ আৰু ৰপ্তানিত নিষেধাজ্ঞা আৰোপ কৰিলেও কেতবোৰ প্ৰশ্নৰ উদয় হৈছে। বিগত বৰ্ষত অৰ্ধ শতাধিকৰো অধিক ঔষধ বিপদজ্জনক বুলি প্ৰমাণিত হোৱাৰ পাছতো ঔষধ প্ৰস্তুতকাৰী প্ৰতিষ্ঠানৰ ওপৰত নাকি লগাব পৰা নাই কিয়?
