কা বিৰোধী আন্দোলনে ভৰপক ৰূপ লোৱাৰ সময়ত অৰ্থ্যাৎ যোৱা ১২ ডিচেম্বৰৰ দিনা গ্ৰেপ্তাৰ হোৱা কৃষক নেতা অখিল গগৈ প্ৰায় তিনিমাহ ধৰি কাৰাগাৰত কাৰাৰুদ্ধ।
কাৰাগাৰাত থকাৰ সময়তে বিভিন্ন বেমাৰে আগুৰি ধৰা কৃষক নেতাজন যোৱা চাৰিদিন ধৰি শয্যাগত।
যোৱা ২৯ ফেব্ৰুৱাৰিত প্ৰচণ্ড পেটৰ বিষত আক্ৰান্ত হৈ জিএমছিএইচত কিছু সময়ৰ বাবে চিকিৎসাধীন হৈ থকা অখিল গগৈ যোৱা ৪ দিন ধৰি কাৰাগাৰৰ বিচনাত বাগৰি থকাৰ পাছতো তেওঁৰ কোনো উন্নত চিকিৎসা নকৰাৰ অভিযোগ উত্থাপন হৈছে।
আজি অখিলৰ পত্নী গীতাশ্ৰী তামুলীয়ে নিয়াৰ আদালতত অখিলৰ উন্নত চিকিৎসাৰ বাবে অনুমতি বিচাৰি এক লেখ আবেদন দাখিল কৰে।
অখিলৰ পত্নীয়ে আবেদনত উল্লেখ কৰা মতে তেওঁ প্ৰচণ্ড পেটৰ বিষ, জ্বৰ, প্ৰসাৱৰ সমস্যা আৰু পিঠিৰ বিষত আক্ৰান্ত হৈ আছে।
পত্নীৰ এই আবেদনৰ ভিত্তিত নিয়া বিশেষ ন্যায়াধীশৰ আদালতে কাইলৈ জেইলৰ অধীক্ষকক অখিল গগৈৰ স্বাস্থ্যৰ প্ৰতিবেদন দাখিল কৰিবলৈ নিৰ্দেশনা দিছে। সেই প্ৰতিবেদনৰ পাছত আদালতে চিকিৎসা সন্দৰ্ভত এক ৰায় প্ৰদান কৰিব বুলি জানিব পৰা গৈছে।
উল্লেখ্য যে, অহা ৭ মাৰ্চত অখিল গগৈৰ কন্ঠ পৰীক্ষাৰ বাবে নিয়াৰ আদালতত হাজিৰ কৰোৱাৰ কথা আছিল।
যোৱা ১৪ ডিচেম্বৰত NIA ই গগৈৰ বিৰুদ্ধে গোচৰ ৰুজু কৰিছিল। সংস্থাটোৱে দাখিল কৰা এজাহাৰত কৃষক নেতা গৰাকীক মাওবাদী সজোৱাৰ লগতে তেওঁৰ বিৰুদ্ধে কেইবাটাও বে-আইনী কাৰ্যকলাপ প্ৰতিৰোধ আইনৰ ধাৰা জাপি দি ১৬ ডিচেম্বৰত গগৈক NIAই গ্ৰেপ্তাৰ কৰিছিল।
গগৈৰ বিৰুদ্ধে NIAই ভাৰতীয় দণ্ডবিধিৰ ধাৰা ১২০ বি (অপৰাধমূলক ষড়যন্ত্ৰৰ শাস্তি), ১২৪ এ (ৰাষ্ট্ৰদ্ৰোহ), ১৫৩ এ (বেআইনী ) আৰু ১৫৩ বি তথা বেআইনী কাৰ্যকলাপ প্ৰতিৰোধ আইন (UAPA)ৰ ধাৰা ১৮ আৰু ৩৯ ডিৰ অধীনত ১৩/২০১৯ নম্বৰৰ গোচৰ ৰুজু কৰিছিল।
