নগাঁও জিলাৰ চামগুৰি আৰু ৰূপহীহাটত জাল নোট প্ৰস্তুত আৰু সৰবৰাহ কৰা কেইবাটাও বৃহৎ দুষ্ট চক্ৰ সক্ৰিয় হৈ পৰিছে ।
ক্ৰমশঃ অপৰাধীৰ ৰম্যভূমিলৈ পৰ্যবসিত হ’বলৈ ধৰা নগাঁৱৰ চামগুৰিত শুকুৰবাৰে নিশা আৰক্ষীৰ এটা বিশেষ দলে চলোৱা এক ব্যাপক অভিযানত উৎখাত হয় সম্প্ৰতি বৃহত্তৰ অঞ্চলটোত সক্ৰিয় হৈ থকা নকল টকা প্ৰস্তুত তথা সৰবৰাহ কৰা এটা কুখ্যাত অসাধু চক্ৰ।
এক গোপন সুত্ৰৰ পম খেদি আৰক্ষীয়ে চামগুৰিৰ মোৱামাৰিত চলোৱা অভিযান কালত বৃহৎ পৰিমাণৰ নকল নোট সহ এটা নকল টকা বনোৱা মেচিন জব্দ কৰিবলৈ সক্ষম হয়।
এ.এচ-০১এল.চি-৬৫৩৪ নম্বৰৰ এখন চুইফ্ট ডিজায়াৰ গাড়ীৰে ধৃত চক্ৰটোৱে চামগুৰিৰ মোৱামাৰীৰ এক অজ্ঞতা স্থানলৈ প্ৰায় বিশ লক্ষাধিক নকল টকা আৰু নকল টকা চপা কৰা এটা মেচিনো সৰবৰাহৰ চেষ্টা চলাইছিল আৰু সেই খবৰ আৰক্ষীয়ে লাভ কৰি অতৰ্কিতে অঞ্চলটোত চলোৱা অভিযানত আৰক্ষীৰ জালত পৰে ধৃত চক্ৰটো।
অভিযানত আৰক্ষীৰ দলটোৱে চুইফ্ট ডিজায়াৰ গাড়ী খন জব্দ কৰাৰ লগতে লক্ষীমপুৰ বিহপুৰীয়াৰ খাইৰুল ইছলাম আৰু শোণিতপুৰ ঢেকিয়াজুলিৰ আজিম উদ্দিন নামৰ দুজনকৈ অসাধু লোকক গ্ৰেপ্তাৰ কৰে যদিও আন কেইবাটাও অসাধু সৰবৰাহকাৰী ঘটনাস্থলীৰ পৰা পলাই যাবলৈ সক্ষম হয় বুলি জানিব পৰা গৈছে।
আটকাধীন দুয়োগৰাকী যুৱকক বৰ্তমান চামগুৰি আৰক্ষী থানাত সোধপোছ অব্যাহত ৰখা হৈছে।
উল্লেখযোগ্য যে, ইয়াৰ পূৰ্বেও বহুবাৰ নগাঁৱৰ চামগুৰিত নকল টকা প্ৰস্তুত কৰা কেইবাটাও আসাধু চক্ৰ আৰক্ষীয়ে উৎখাত কৰি আহিছে যদিও চামগুৰি আৰক্ষীক বুঢ়া আঙুলি দেখুৱাই একাংশ অপৰাধীয়ে অতিশয় ৰহস্যজনকভাবে বৃহত্তৰ অঞ্চলটোত অবাধে নকল নোটৰ ৰমৰমীয়া বেহা চলাই যাবলৈ সক্ষম হৈছে।
