ক’ৰ’নাই দেশৰ নতুন নতুন ঠাইলৈ সংক্ৰমিত হোৱাৰ সময়তে সমগ্ৰ অসমত সুৰাৰ বিপনী আৰু বাৰসমূহ অহা ৩১ মাৰ্চলৈকে সম্পূৰ্ণৰূপে বন্ধ কৰা নিৰ্দেশনা জাৰি কৰিছে অসম আৱকাৰী বিভাগে।
আৱকাৰী বিভাগৰ আয়ুক্তই অসমৰ সকলো জিলাৰ উপায়ুক্তৰ লগতে আৱকাৰী অধীক্ষ আৰু উপ অধীক্ষকলৈ এক অতি শীঘ্ৰেই এই নিৰ্দেশনা কাৰ্যকৰী কৰিবলৈ পত্ৰ প্ৰেৰণ কৰিছে।
হাইলাকান্দি, ওডালগুৰি, দৰং, নলবাৰী, যোৰহাট, তিনিচুকীয়া, গোৱালপাৰা, বৰপেটা, গোলাঘাট, ডিব্ৰুগড়, লখিমপুৰ, ধেমাজি, মৰিগাঁও, ধুবুৰী, নগাঁও, বঙাইগাঁও, কোকৰঝাৰ, কাচাৰ, কৰিমগঞ্জ, কাৰ্বি আংলং, ডিমা হাছাও, শোণিতপুৰ, চিৰাং আৰু কামৰূপ(মহানগৰ) জিলাৰ উপায়ুক্ত আৰু আৱকাৰী অধীক্ষক/উপ অধীক্ষকলৈ প্ৰেৰণ কৰা No. III-81/2018-2019/43. dt. 18.03.2020 নং পত্ৰত আৱকাৰী আয়ুক্তই অতি শীঘ্ৰেই পৰৱৰ্তী নিৰ্দেশ নিদিয়া পৰ্যন্ত এই নিৰ্দেশনা কাৰ্যকৰী কৰিবলৈ নিৰ্দেশ জাৰি কৰিছে।
আনহাতে অসম চৰকাৰৰ ৰাজনৈতিক (এ) বিভাগে অন্য এখন পত্ৰৰ জৰিয়তে ৰাজ্যৰ সকলোবোৰ বাৰ, নাইট ক্লাব, চেলুন, বিউটি পাৰ্লাৰ বন্ধ কৰাৰ নিৰ্দেশ জাৰি কৰিছে।
