বৰ্তমান গোটেই বিশ্ববাসী কৰ’না ভাইৰাচৰ কৱলত পৰি এক গভীৰ সংকটত অৱস্থান কৰিছে।
ভাৰতো এই সংকটৰ গ্ৰাসৰপৰা মূক্ত নহয়। কেন্দ্ৰীয় অথবা ৰাজ্য চৰকাৰে নাগৰিকক এই সংকটৰ পৰা আঁতৰত ৰখাৰ বাবে সকলো ধৰণৰ প্ৰচেষ্টা অব্যাহত ৰাখিছে।
দেশৰ শাসক-বিৰোধী ৰাজনৈতিক নেতা, অভিনেতা খেলুৱৈকে ধৰি ভিন্নজনে নিজাববীয়াকৈ কৰ’নাক প্ৰতিহত কৰিবলৈ চৰকাৰলৈ সাহায্য আগবঢ়াইছে।
এনে এক জটিল সন্ধক্ষণত নিজৰ এদিনৰ দৰমহা ৰাজ্য চৰকাৰলৈ আগবঢ়োৱাৰ কথা ঘোষণা কৰিছে সদৌ অসম প্ৰাথমিক টেট উত্তীৰ্ণ শিক্ষক সমাজে।
নৰ্থ ইষ্ট নাওৰ সাংবাদিকক এই কথা জানিবলৈ দিয়ে শিক্ষক সমাজৰ সাধাৰণ সম্পাদক মিৰাজুল ৰচিদে।
ৰচিদে কয়, “চৰকাৰক সামান্য সকাহ দিয়াৰ উদ্দেশ্যে আমাৰ সৰ্বশিক্ষাৰ অধীনস্থ প্ৰতিজন শিক্ষক সদস্যৰ পৰা এদিনৰ দৰমহা কৰ্তন কৰি চৰকাৰী সাহায্য পুঁজিলৈ বৰঙণি আগবঢ়োৱাৰ সিদ্ধান্ত গ্ৰহণ কৰিছো।”
এই বিষয়ে ৰাজ্যৰ শিক্ষা বিত্ত আৰু স্বাস্থ্য মন্ত্ৰী ডঃ হিমন্ত বিশ্ব শৰ্মা আৰু প্ৰাথমিক শিক্ষা বিভাগৰ আয়ুক্ত সচিব তথা সৰ্বশিক্ষা অভিযান মিছনৰ সঞ্চালকলৈ আনুষ্ঠানিক পত্ৰ প্ৰেৰণ কৰা হৈছে বুলি ৰচিদে জানিবলৈ দিয়ে।
মিৰাজে জনোৱা অনুসৰি প্ৰাথমিক আৰু উচ্চ প্ৰাথমিকৰ মুঠ ৩০০৮৫ গৰাকী শিক্ষকৰ এদিনৰ দৰমহা প্ৰায় ৩ কোটি হ’ব। সেইখিনি ধন ৰাজ্য চৰকাৰক শিক্ষকসকলৰ বেংক একাউণ্টৰ পৰা কৰ্তন কৰিবলৈ ৰাজ্য চৰকাৰক অনুৰোধ জনায় সদৌ অসম প্ৰাথমিক টেট উত্তীৰ্ণ শিক্ষক সমাজে।
