দেশজোৰা লকডাউনৰ ফলত নতুন দিল্লীকে ধৰি দেশৰ মহানগৰসমূহত বায়ু প্ৰদূষণ বহু বেছি পৰিমাণে হ্ৰাস পাইছে।
কৰ’নাভাইৰাছৰ বিৰুদ্ধে দেশজোৰা লকডাউনৰ ফলত প্ৰায় ১৩০ কোটি মানুহৰ যাতায়াত প্ৰায় বন্ধ হৈ আছে।
চফৰ (System of Air Quality and Weather Forecasting and Research)ৰ মতে এই সময়চোৱাত দিল্লীত ধূলিকণাসদৃশ প্ৰদূষক PM2.5 দিল্লীত ৩০ শতাংশ হ্ৰাস পাইছে।
আহমেদাবাদ আৰু পুনেত এই পৰিমাণ ১৫ শতাংশ হ্ৰাস পাইছে।
আন এবিধ প্ৰদূষক নাইট্ৰ’জেন অক্সাইডৰ পৰিমাণো হ্ৰাস পাইছে। যান-বাহনৰ চলাচলৰ ফলত বৃদ্ধি পোৱা এই নাইট্ৰ’জেন অক্সাইডে শ্বাস-প্ৰশ্বাসজনিত সমস্যা বৃদ্ধি কৰে।
পুনেত নাইট্ৰ’জেন অক্সাইডৰ পৰিমাণ ৪৩, মুম্বাইত ৩৮ আৰু দিল্লীত ৫০ শতাংশ হ্ৰাস পাইছে।
যান-বাহনৰ লগতে বিভিন্ন কল-কাৰখানাসমূহো বন্ধ থকাৰ ফলত বায়ু প্ৰদূষণৰ মাত্ৰা হ্ৰাস পাইছে।
চফৰৰ মতে সাধাৰণতে মাৰ্চ মাহত ভাৰতৰ নগৰসমূহৰ প্ৰদূষণ মধ্যমীয়া স্তৰ (বায়ুৰ গুণমান ১০০-২০০)ত থাকে, কিন্তু বৰ্তমান ই সন্তোষজনক (৫০-১০০) বা ভাল (০-৫০) স্তৰত আছে।
কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ মতে প্ৰদূষণে হাহাকাৰৰ সৃষ্টি কৰা খোদ নতুন দিল্লীত বৰ্তমান বায়ুৰ গুণমান ভাল স্তৰত আছে।
তাৰোপৰি ব’ৰ্ডৰ নিৰীক্ষণত থকা দেশৰ আন ৯২খন নগৰতো বায়ুৰ গুণমান “ভাল”ৰ পৰা “সন্তোষজনক”ৰ ভিতৰত আছে।
বায়ুৰ গুণমান ২০১–৩০০ক পুতৌজনক, ৩০১—৪০০ক অতি পুতৌজনক আৰু ৪০১—৫০০ক গুৰুতৰ বুলি ধৰা হয়।
দেওবাৰলৈকে বিশ্বত ৬৭৮,৯১০ গৰাকী কৰ’নাভাইৰাছ আক্ৰান্ত ৰোগী চিনাক্ত হৈছে। মৃত্যু হৈছে ৩১ হাজাৰতকৈয়ো অধিক লোকৰ।
ভাৰতত কৰ’নাভাইৰাছ আক্ৰান্তৰ সংখ্যাই এহেজাৰৰ সীমা অতিক্ৰম কৰিছে। মৃত্যু হৈছে ২৫ গৰাকী লোকৰ।
