সমগ্ৰ বিশ্বতে ক’ৰ’নাৰ আতংকই বিৰাজ কৰাৰ সময়তে ভাৰতবৰ্ষত চলি আছে লকডাউন। প্ৰধান মন্ত্ৰী নৰেন্দ্ৰ মোদীৰ আহ্বানক সন্মান প্ৰদৰ্শন কৰি মানৱ জাতিক ৰক্ষা কৰাৰ স্বাৰ্থত সকলো এতিয়া গৃহবন্দী।
গৃহবন্দী তথা লকডাউনৰ বাবে তীব্ৰ খাদ্য সংকটত ভুগিছে দেশৰ দুখীয়া শ্ৰেণীৰ হাজাৰ-হাজাৰ লোক। এনে দুৰ্যোগৰ সময়ত আজি তামুলপুৰ আঞ্চলিক গৰিয়া-মৰিয়া যুৱ ছাত্ৰ পৰিষদৰ বিষয়-ববীয়াসকল আৰু নুৰাণী স্বেচ্ছাসেৱী সংগঠনৰ বিষয়ববীয়া সকলে দুখীয়া জনগণৰ ওচৰত থিয় দিছে।
আজি পুৱা তামুলপুৰ আঞ্চলিক গৰিয়া-মৰিয়া যুৱ ছাত্ৰ পৰিষদৰ সভাপতি আমিনুল হক চৌধুৰী আৰু সম্পাদক ৰুবুল আলিৰ নেতৃত্বত দিমিলাপৰ গাঁৱৰ বিভিন্ন জাতি-জনগোষ্ঠীৰ শতাধিক দুখীয়া পৰিয়ালৰ মাজত খাদ্য বস্তু বিতৰণ কৰে।
ইতিমধ্যে বিগত তিনিটা দিনত আঠ শতাধিক পৰিয়ালৰ মাজত ছাত্র সংগঠটোৱে আৰু স্বেচ্ছাসেৱী সংগঠনটোৱে সামাজিক ব্যৱধান বজাই ৰাখি খাদ্য সামগ্ৰী বিতৰণ কৰি মহানুভৱতাৰ পৰিচয় দাঙি ধৰিছে।
ইফালে ছাত্র সংগঠনটোৰ সভাপতি আমিনুল হক চৌধুৰীয়ে লক ডাউনৰ সময়ত সকলো নীতি-নিয়ম মানি চলি সকলো ৰাইজক ঘৰৰ ভিতৰত আৱদ্ধ থাকি নিজৰ লগতে দেশবাসীক ৰক্ষা কৰাৰ বাবে আহ্বান জনায়।
