কোভিদ-১৯-ৰ সংক্ৰমণ ৰোধৰ বাবে অৰুণাচল প্ৰদেশ চৰকাৰে ৰাজ্যখনত ল’কডাউন ৩০ এপ্ৰিললৈ বৃদ্ধি কৰে।
মুখ্য সচিৱ নৰেশ কুমাৰে ৰাষ্ট্ৰজোৰা ল’কডাউন ১৪ এপ্ৰিলত সামৰণি পৰিলেও অৰুণাচল প্ৰদেশত ৩০ এপ্ৰিললৈ ল’কডাউন বাহাল থাকিব বুলি সদৰি কৰে।
এই ল’কডাউনৰ সময়ছোৱাত ৰাজ্য চৰকাৰৰ দ্বাৰা পৰিচালিত বাছকহে চলাচলৰ অনুমতি দিয়া হ’ব বুলিও সচিৱ গৰাকীয়ে লগতে উল্লেখ কৰে।
আনহাতে, ল’কডাউনৰ সময়ছোৱাত বিভাগীয় কৰ্তৃপক্ষৰ পৰা অনুমতি লোৱাৰ পাছত নিৰ্মাণ কাৰ্য্যৰ কাম কৰিব পৰা যাব যদিও প্ৰব্ৰজনকাৰী শ্ৰমিকক কামত লগাব নোৱাৰিব বুলিও কুমাৰে স্পষ্ট কৰি দিয়ে।
তদুপৰি, অৰুণাচল প্ৰদেশৰ টাৱাং, তেজু, আলো, পাছিঘাট, জিৰো আৰু খোনছাত ক’ৰ’না ৰোগীৰ চিকিৎসাৰ বাবে বিশেষ চিকিৎসাৰ ব্যৱস্থা ৰাজ্য চৰকাৰে কৰিছে বুলি তেও জানিবলৈ দিয়ে।
উল্লেখযোগ্য যে, প্ৰধান মন্ত্ৰী নৰেন্দ্ৰ মোদীয়ে ঘোষণা কৰা ২১ দিনীয়া ল’কডাউনৰ ১৪ এপ্ৰিলত সামৰণি পৰিব।
ইতিমধ্যে ওড়িশা, পাঞ্জাৱ, তামিলনাডু, মহাৰাষ্ট্ৰ আদি ৰাজ্যই নিজাববীয়াকৈ ল’কডাউন ৩০ এপ্ৰিল আৰু ১ মে’লৈ বৃদ্ধি কৰাৰ কথা ঘোষণা কৰিছে।
