মেঘালয়ত মৃত্যু হোৱা ৰাজ্যখনৰ প্ৰথম গৰাকী ক’ৰ’না ৰোগীৰ ছয় গৰাকী সম্পৰ্কীয়ৰ শৰীৰতো ক’ৰ’না ভাইৰাছৰ উপস্থিতি ধৰা পৰিছে।
মেঘালয়ৰ মুখ্য মন্ত্ৰী কনৰাড চাংমাই আজি টুইটাৰ যোগে এইকথা ঘোষণা কৰে।
‘‘বৰ্তমানলৈ ক’ৰ’না সংক্ৰমণৰ পৰীক্ষা সম্পন্ন হোৱা ৬৮ গৰাকী লোকৰ ভিতৰত ৬ গৰাকীৰ ক’ৰ’না প’জিটিভ বুলি ফলাফল আহিছে, প’জিটিভ অহা লোক ৰাজ্যৰ প্ৰথম গৰাকী ক’ৰ’না আক্ৰান্ত ৰোগীৰ আত্মীয় আৰু সহায়কাৰী। ছয়টা অন্য নমুনা পুনৰ পৰীক্ষা কৰা হ’ব। বাকী সকলো ব্যক্তিৰ নমুনা নিগেটিভ আহিছে,’’ নিজৰ টুইটাৰত মুখ্য মন্ত্ৰী চাংমাই এইদৰে উল্লেখ কৰে।
বুধবাৰে শ্বিলঙৰ বেথানি হস্পাতালত মৃত্যু হোৱা মেঘালয়ৰ প্ৰথম গৰাকী ক’ৰ’না আক্ৰান্ত ৰোগীৰ আন্তোষ্টিক্ৰিয়াৰ সিদ্ধান্ত শীঘ্ৰেই লোৱা হ’ব বুলি ৰাজ্যৰ স্বাস্থ্য মন্ত্ৰী এ এল হেকে কয়।
বিশ্ব স্বাস্থ্য সংস্থা আৰু ভাৰত চৰকাৰৰ নিৰ্দেশনা অনুসৰি ক’ৰ’নাত আক্ৰান্ত হৈ মৃত্যু হোৱা ব্যক্তি গৰাকীৰ অন্তিম সংস্কাৰৰ ব্যৱস্থা গ্ৰহণ কৰা হ’ব বুলি মেঘালয় চৰকাৰৰ তৰফৰ পৰা কোৱা হয়।
মেঘালয়ৰ প্ৰথম গৰাকী ক’ৰ’নাত আক্ৰান্ত ৰোগী কোনোধৰণৰ ভ্ৰমণ পঞ্জীৰ ইতিহাস নথকাকৈ ক’ৰ’নাত আক্ৰান্ত হৈছিল।
ক’ৰ’নাত আক্ৰান্ত হৈ মৃত্যু হোৱা ব্যক্তি গৰাকী তেওঁৰ নাতিৰ দ্বাৰা ক’ৰ’নাত সংক্ৰমিত হোৱা বুলি সন্দেহ প্ৰকাশ কৰা হৈছে।
এয়াৰ ইণ্ডিয়াত পাইলট হিচাপে কৰ্মৰত মৃত্যু হোৱা ব্যক্তি গৰাকীৰ নাতিয়েকে কিছুদিন পূৰ্বে নিউয়ৰ্কৰ পৰা উভতি আহিছিল।
