ক’ৰ’না ভাইৰাছৰ সংক্ৰমণৰ বাবে সমগ্ৰ দেশৰ শিক্ষানুষ্ঠানসমূহ বন্ধ হৈ আছে। দেশত ল’কডাউন ঘোষণা কৰাৰ পূৰ্বৰে পৰা প্ৰায়বোৰ শিক্ষানুষ্ঠানত বন্ধ ঘোষণা কৰা হৈছিল।
ক’ৰ’না ভাইৰাছৰ সংক্ৰমণৰ বাবে শিক্ষানুষ্ঠানসমূহ বন্ধ থকাত শিক্ষাৰ্থী সকলৰ পাঠ্যক্ৰম গ্ৰহণ বাধাগ্ৰস্ত হৈ পৰিছে।
দেশৰ বিভিন্ন প্ৰান্তৰ লগতে অসমৰ শিক্ষানুষ্ঠান সমূহো ক’ৰ’নাৰ সংক্ৰমণৰ বাবে বন্ধ হৈ আছে।
শেহতীয়া পৰিস্থিতিত শিক্ষাৰ্থী সকলৰ ক্ষতিৰ প্ৰতি লক্ষ্য ৰাখি গুৱাহাটী বিশ্ববিদ্যালয়ে ইয়াৰ সকলো স্বীকৃতিপ্ৰাপ্ত মহাবিদ্যালয় সমূহৰ চলিত শিক্ষাবৰ্ষৰ জুলাই মাহৰ গ্ৰীষ্মকালীন বন্ধ বাতিল কৰিছে।
এক বিজ্ঞপ্তিযোগে গুৱাহাটী বিশ্ববিদ্যালয় কৰ্তৃপক্ষই এই কথা ঘোষণা কৰে।
অৱশ্যে, কেন্দ্ৰ চৰকাৰৰ লগতে ৰাজ্য চৰকাৰে পৰিস্থিতি স্বাভাৱিক হোৱা বুলি ঘোষণা কৰাৰ পাছতে বিশ্ববিদ্যালয়ৰ সকলো ধৰণৰ ক্ৰিয়াকলাপ স্বাভাৱিক ভাৱে চলি থাকিব বুলিও বিজ্ঞপ্তিত উল্লেখ কৰা হয়।
উল্লেখযোগ্য যে, ল’কডাউনৰ সময়ত বহু শিক্ষানুষ্ঠানে ইণ্টাৰনেটৰ সহায়ত অনলাইন পাঠদান অব্যাহত ৰাখিছে।
