কৃষক নেতা অখিল গগৈকে প্ৰমূখ্যে কৰি কা বিৰোধী আন্দোলনৰ নেতাসকলক মনে সজা গোচৰত বাৰম্বাৰ গ্ৰেপ্তাৰ কৰি কাৰাগাৰত আবদ্ধ কৰি ৰাখি চৰকাৰে স্বেচ্ছাচাৰী শাসন চলাইছে বুলি গুৰুতৰ অভিযোগ উত্থাপন কৰিছে অনুসূচিত জাতি যুৱ ছাত্ৰ পৰিষদৰ সভাপতি ৰুবুল দাসে।
শুকুৰবাৰে নৰ্থ-ইষ্ট নাওৰ সাংবাদিকৰ আগত দাসে কয়, ‘এতিয়া আকৌ ৰাষ্ট্ৰীয় অনুসন্ধানকাৰী সন্থাই সঠিক সময়ত চাৰ্জশ্বীট দাখিল কৰিব নোৱাৰি পুনৰ অখিল গগৈক নতুন নতুন গোচৰত গ্ৰেপ্তাৰ কৰি গণতন্ত্ৰক হত্যা কৰিছে।’
দাসে লগতে অখিল গগৈকে ধৰি অন্যান্য নেতাসকলক পুনৰ গ্ৰেপ্তাৰ কৰা কাৰ্য্যক গৰিহণা দিয়াৰ লগতে ‘কা’ আন্দোলনৰ বন্দী নেতাসকলক শীঘ্ৰেই মুক্তি দিবলৈ চৰকাৰক দাবী জনায়।
আনহাতে, কৰ’না ভাইৰাছৰ সংক্ৰমণৰ পৰা নিজৰ লগতে আনকো বচাই ৰাখিবলৈ নেতাজনে সকলো অসমবাসীক ল’কডাউনৰ দিনকেইটা নিজ নিজ ঘৰত সোমাই থাকিবলৈ আহ্বান জনায়।
