মেঘালয়ত পুনৰ বৃদ্ধি পালে ক’ৰ’না আক্ৰান্তৰ সংখ্যা। শনিবাৰে দুগৰাকীৰ দেহত এই ভাৰাছবিধ ধৰা পৰাত ৰাজ্যখনত ক’ৰ’না আক্ৰান্তৰ সংখ্যা ১০লৈ বৃদ্ধি পালে।
আজি চিনাক্ত হোৱা দুয়োগৰাকী মেঘালয়ৰ প্ৰথমগৰাকী কোভিদ-১৯ত আক্ৰান্ত হৈ মৃত্যু হোৱা ৬৯ বছৰীয়া চিকিৎসক গৰাকীৰ সম্পৰ্কীয়। নতুনকৈ আক্ৰান্ত হোৱা এগৰাকী সহায়ক আৰু আনগৰাকী সম্পৰ্কীয় বুলি জানিব পৰা গৈছে।
মেঘালয়ৰ মুখ্য মন্ত্ৰী কনৰাড চাংমাই আজি টুইটাৰ যোগে এই কথা ঘোষণা কৰে।
চাংমাই টুইটযোগে জানিবলৈ দি কয় যে ৰাজ্যখনত ২৪,৩৮২ গৰাকী লোকক ক’ৰ’নাৰ পৰীক্ষা কৰোৱা হৈছে আৰু হেল্পলাইন নম্বৰৰ জৰিয়তে ৪৯,৩৯১ টা ফোনকল লাভ কৰিছে।
তদুপৰি ৰাজ্যখনৰ ২৫৫৭ গৰাকী লোকক কোৱাৰেণ্টাইনত ৰখা হৈছে বুলিও মুখ্য মন্ত্ৰীগৰাকীয়ে জানিবলৈ দিয়ে।
উল্লেখ্য যে ক’ৰ’না ভআইৰাছৰ সংহাৰৰ পৰা উত্তৰ-পূব বহু দিনলৈ মুক্ত হৈ আছিল যদিও এতিয়া অঞ্চলটোত এই সংখ্যা ৫০ লৈ বৃদ্ধি পালে। আক্ৰান্তৰ ভিতৰত অসমত সৰ্বাধিক ৩৪ গৰাকী, মেঘালয়ৰ ৯ গৰাকী, ত্ৰিপুৰা আৰু মণিপুৰৰ দুগৰাকীকৈ আৰু অৰুণাচল, মিজোৰাম আৰু নাগালেণ্ডত এজনকৈ লোক ক’ৰ’নাত আক্ৰান্ত হৈছে।
আনহাতে, এই পৰ্যন্ত অসম আৰু মেঘালয়ত এজনকৈ লোক ইয়াৰ ফলত মৃত্যু হৈছে।
