বোকাখাতত দৰিদ্ৰ লোকক বিতৰণৰ বাবে ৰাজহুৱা বিতৰণ ব্যৱস্থা (PDS)ৰ অধীনত আৱন্তিত ৮০০ কুইণ্টল চাউল হৰলুকি কাণ্ডত অভিযুক্ত কাজিৰঙা সমবায় সমিতিৰ গুদাম ৰক্ষক পলাশ গগৈ আৰু সম্পাদক বুবুল দলৈক অৱশেষত আৰক্ষীয়ে গ্ৰেপ্তাৰ কৰে।
শুকুৰবাৰে বোকাখাত আৰক্ষীয়ে কাজিৰঙাৰ পৰা পলাশ গগৈক গ্ৰেপ্তাৰ কৰাৰ পিচত আজি দেৰগাঁৱৰ পৰা সম্পাদক বুবুল দলৈক গ্ৰেপ্তাৰ কৰিছে। কাজিৰঙা সমবায় সমিতিত সংঘৰ্টিত চাউল কেলেংকাৰীৰ পাচত যোৱা ৩ এপ্ৰিলৰ পৰাই সমবায় সমিতিখনৰ সম্পাদক বুবুল দলৈ আৰু গুদাম ৰক্ষক পলাশ গগৈ পলাতক অৱস্থাত আছিল।
স্থানীয় লোকৰ অভিযোগ মতে ল’কডাউনৰ সময়ত বিতৰণৰ বাবে সমবায় সমিতিখনলৈ অহা ৮০০ কুইণ্টল চাউলৰ ৬০ শতাংশতকৈও অধিক চাউল হৰলুকি হৈছিল। সমবায় সমিতিৰ সম্পাদক আৰু গুদাম ৰক্ষকে হৰলুকি হোৱা চাউল অধিক দামত চোৰাংকৈ বিক্ৰী কৰি আহিছিল বুলি আৰক্ষীৰ তদন্তত প্ৰকাশ।
স্থানীয় ৰাইজৰ অভিযোগ মতে ২০১০ চনৰ পৰাই কাজিৰঙা সমবায় সমিতিত ব্যপক দুৰ্নীতি চলি আহিছিল। হিতাধিকাৰীৰ প্ৰাপ্যৰ পৰা প্ৰতি বাৰতে চাউল চান কাঢ়িছিল সমবায় সমিতিখনৰ বিষয়ববীয়াই ৷ যাৰ বাবে প্ৰাপ্য চাউলৰ পৰা বঞ্চিত হৈ আহিছিল সমবায়খনৰ হিতাধিকাৰীসকল৷
শেহতীয়াকৈ ল’কডাউনৰ সাহাৰ্যৰ বাবে চৰকাৰে যোগান ধৰা ৮০০ কুইন্টল চাউলৰো হৰলুকি হোৱাত হিতাধাৰীসকলে বোকাখাতৰ মহকুমা প্ৰশাসনক অভিযোগ কৰাৰ লগতে তদন্ত কৰি দোষীক উচিত শাস্তি দিয়াৰ দাবী জনাইছিল।
বোকাখাতৰ জীপাল কৃষক শ্ৰমিক সংঘয়ো বিষয়টোকলৈ বোকাখাত আৰক্ষী থানাত এখন এজাহৰ দাখিল কৰিছিল। ইয়াৰ পাচৰে পৰাই কাজিৰঙা সমবায় সমিতিৰ সম্পাদক বুবুল দলৈ আৰু গুদাম ৰক্ষক পলাশ গগৈয়ে আত্মগোপন কৰি আছিল ৷
অৱশ্যে ইয়াৰ মাজতে যোৱা ৭ এপ্ৰিলত বোকাখাত আৰক্ষীয়ে জীপাল কৃষক শ্ৰমিক সংঘৰ দুই নেতা সোনেশ্বৰ নৰহ আৰু প্ৰনৱ দলেক কাজিৰঙা সমবায় সমিতিৰ বিৰুদ্ধে তেওঁলোকে দাখিল কৰা এজাহাৰৰ সম্পৰ্কত সোধা-পোচাৰ বাবে থানালৈ মাতি এটা প্ৰায় দুবছৰীয়া পুৰণা গোচৰত গ্ৰেপ্তাৰ কৰে।
লগতে পঢ়ক বোকাখা়তৰ জীপাল কৃষক শ্ৰমিক সংঘৰ নেতা সোনেশ্বৰ নৰহ আৰু প্ৰনৱ দলেক গ্ৰেপ্তাৰ
জানিব পৰা মতে গ্ৰেপ্তাৰৰ এদিন পূৰ্বে সোনেশ্বৰ নৰহ আৰু প্ৰনৱ দলেই সমবায় সমিতিখনত ঘটা উক্ত বৃহৎ চাউল হৰলুকি কাণ্ডৰ এক উচ্চস্তৰীয় তদন্ত দাবী কৰি মুখ্য মন্ত্ৰীলৈ পত্ৰ প্ৰেৰণ কৰিছিল।
আজি ঘটনাৰ সম্পৰ্কত বোকাখাত আৰক্ষী থানাত ভাৰতীয় দণ্ডবিধি আইনৰ ৪০৯ আৰু ৪২০ ধাৰাৰ লগতে অত্যৱশকীয় সামগ্ৰী আইনৰ ৭ ধাৰাত ১১৩/২০ নম্বৰৰ এটা গোচৰ ৰজু কৰি বোকাখাতৰ আদালতত হাজিৰ কৰে ৷ আদালতে দুয়োজনকে তিনিদিনৰ বাবে আৰক্ষীৰ জিম্মালৈ প্ৰৰণ কৰে ৷
