দেশজুৰি চলি থকা ল’কডাউনৰ মাজতে কাজিৰঙা ৰাষ্ট্ৰীয় উদ্যানৰ ২০১৯-২০ পৰ্যটন বৰ্যৰ সামৰণি পৰিছে। কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰে প্ৰকাশ কৰা এক সমীক্ষা মতে চলিত বৰ্ষত ৰাষ্ট্ৰীয় উদ্যানখনে ৪ কোটি ৭৫ লাখ ৮৩ হেজাৰ ৪৯১ টকাৰ ৰাজহ সংগ্ৰহ কৰে।
বিগত বৰ্ষৰ অক্টোবৰ মাহত আৰম্ভ হোৱা চলিত পৰ্যটন বৰ্ষৰ আৰম্ভণিতে পৰ্যটকৰ আগমনৰ সংখ্যাৰ ওপৰত ভিত্তি কৰি উদ্যান কৰ্তৃপক্ষই ৭ কোটি টকাৰ ৰাজহ সংগ্ৰহ কৰাৰ আশা কৰিছিল যদিও পৰ্যটন বৰ্ষৰ আৰম্ভনিতেই দেশজুৰি হোৱা ‘কা’ বিৰোধী আন্দোলন আৰু পৰৱৰ্তী সময়ত কভিড১৯ৰ বাবে হোৱা ল’কডাউনৰ ফলত আশা কৰা ধৰণেৰে ৰাজহ সংগ্ৰহ ন’লহ বুলি সঞ্চালক গৰাকীয়ে কয়৷
তেওঁ জনোৱা মতে চলিত বৰ্ষত কাজিৰঙালৈ মুঠ ১,৬৫,৭৪৯ গৰাকী দৰ্শনাৰ্থী আহিছিল। ইয়াৰে বিদেশী দৰ্শনাৰ্থী আছিল ১১,৩৯২ গৰাকী আৰু ১,৫৪,৩৫৭ গৰাকী আছিল দেশী দৰ্শনাৰ্থী৷
উল্লেখযোগ্য যে চলিত পৰ্যটন বৰ্ষৰ অক্টোবৰৰ পৰা ডিচেম্বৰ মাহলৈকে কাজিৰঙাত দেশী-বিদেশী পৰ্যটকৰ আগমন বিগত বৰ্ষৰ তুলনাত যথেষ্ট বেছি আছিল। ইয়াৰ বাবে পৰ্যটকৰ সংখ্যাই দুই লাখ অতিক্ৰম কৰিব বুলি ধাৰণা কৰিছিল উদ্যান কৰ্তৃপক্ষই।
২০১৮ – ১৯ পৰ্যটন বৰ্ষত কাজিৰঙালৈ মুঠ ১,৭৬,১৮১ গৰাকী দৰ্শনাৰ্থী আহিছিল। ইয়াৰে ৭,৪৪৩ গৰাকী আছিল বিদেশী আৰু ১,৬৮,৭৩৮ গৰাকী আছিল দেশী দৰ্শনাৰ্থী।
সাম্প্ৰতিক পৰিস্থিতৰ বাবে চলিত পৰ্যটন বৰ্ষত কাজিৰঙাই ২০১৮-১৯ পৰ্যটন বৰ্ষৰ তুলনাত ৬,৫৮ লাখ টকাৰ ৰাজহ হেৰুৱাব লগা হয়। আনহাতে ২০২০-২১ বিত্তীয় বৰ্ষৰ আৰম্ভণিতে এপ্ৰিল মাহত শূন্য ৰাজহ সংগ্ৰহেৰে উদ্যান কৰ্তৃপক্ষ এক নতুন প্ৰত্যাহ্বানৰ সন্মুখীন হোৱাৰ সম্ভাৱনা আছে।
