বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানত বানপানীৰ সময়ত জীৱ-জন্তু সকলে আশ্ৰয় লৈ থাকিব পৰাকৈ হাইলেন্ড নিৰ্মাণ কৰা প্ৰসংগকলৈ বন বিভাগ আৰু বিভিন্ন স্বেচ্ছাসেৱী সংগঠনৰ লগত আলোচনা কৰাৰ অৰ্থে সোমবাৰ কাজিৰঙাত উপস্থিত হয় সাংসদ কামাখ্যা প্ৰসাদ তাচা ।
কাজিৰঙাৰৰ কহঁৰাত অৱস্থিত বন বিভাগৰ মহি মিৰি সভাগৃহত অনুষ্ঠিত এই আলোচনাত কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰ , বন সংমণ্ডল বিষয়া ৰমেশ গগৈ, সহকাৰী বন সংৰক্ষক ঋতুপৱন বৰা, বনাঞ্চলিক বিষয়া চেলিম আহমেদে, নয়ণ জ্যোতি গগৈ, অনাৰি ৱাইল্ড লাইফ ৱাৰ্ডেন উত্তম শইকীয়া, কাজিৰঙাত কাম কৰি থকা আৰণ্যক, কৰবেট ফাউণ্ডেশ্যন, ৱাইল্ড লাইফ ট্ৰাষ্ট অফ ইণ্ডিয়া , ভূমিকে আদি কৰি কেইবাটাও বেচৰকাৰী স্বেচ্ছাসী সংগঠনৰ প্ৰতিনিধি, কাজিৰঙাৰ সাংবাদিক উপস্থিত থাকে ৷
সাংসদগৰাকীয়ে সকলোৰে লগত কাজিৰঙা ৰাষ্ট্ৰীয় উদ্যানৰ ভিতৰত বন্যপ্ৰাণীৰ সুৰক্ষাৰ কাৰণে নিৰ্মাণ কৰিবলগীয়া হাইলেন্ড, বাট পথকে ধৰি আন আন সমস্যা সম্পৰ্কে আলোচনা কৰে ।
সাংসদগৰাকীয়ে জানিব দিয়া মতে, কেন্দ্ৰীয় বন আৰু পৰিবেশ মন্ত্ৰী প্ৰকাশ জাভেদকাৰক কাজিৰঙাৰ বন্যপ্ৰাণীৰ সুৰক্ষাৰ বাবে উদ্যানত হাইলেন্ড নিৰ্মাণ কৰা আৰু উজনিৰ পৰা অহা গাড়ীবোৰ ডিব্ৰুগডৰ পৰা বগীবিল হৈ আৰু নামনিৰ পৰা যোৱা গাড়ীবোৰ কলিয়াবৰৰ পৰা তেজপুৰহৈ বিকল্প পথেৰে চলাচল কৰাৰ ব্যৱস্থা কৰিবলৈ তেওঁ আহ্বান জনাইছিল।
আলোচনাত কাজিৰঙাৰ জেষ্ঠ সাংবাদিক তথা পৰিবেশ কৰ্মী স্বপন নাথে কাজিৰঙা ৰাষ্ট্ৰীয় উদ্যানৰ দক্ষিণ দিশে থকা কাৰ্বি পাহাৰ অৰ্থাৎ প্ৰাকৃতিক হাইলেন্ড সুৰক্ষিত কৰি কাৰ্বি ৰাইজক আৰ্থিকভাৱে বন বিভাগৰ তৰফৰ পৰা সাহায্য প্ৰদান কৰিবলৈ সাংসদ তাচাক আহ্বান জনায় আৰু সাংসদজনে কথাটো অতি গুৰুত্ব সহকাৰে লৈ পৰৱৰ্তী সময়ত চৰকাৰ তথা কাৰ্বি আংলং জিলা স্বায়ত্ত শাসিত পৰিষদৰ সৈতে আলোচনা কৰিব বুলি কথা দিয়ে ।
আনহাতে, আলোচনাত কালত ৰাজ্যখনৰ আগশাৰীৰ বেচৰকাৰী স্বেচ্ছাসী সংগঠনৰ প্ৰতিনিধি ড০ বিভব কুমাৰ তালুকদাৰ, ড০ ৰথিন বৰ্মন, ড০ অনুপম শৰ্মা আৰু ৱাইল্ড লাইফ ৱাৰ্ডেন কৌশিক বৰুৱাই কাজিৰঙা ৰাষ্ট্ৰীয় উদ্যানত হাইলেন্ড নিৰ্মাণ কৰিব লগা-নলগা সম্পৰ্কে চৰকাৰক আহ্বান জনোৱা এখন স্মাৰক পত্ৰ সাংসদ কামাখ্যা প্ৰসাদ তাচাক অৰ্পণ কৰে।
আলোচনাৰ শেষত তেওঁ বন বিষয়া সকলৰ লগতো বিশেষ আলোচনা কৰি পানবাৰীত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰ পৰিদৰ্শন কৰে ৷
