যি সময়ত দেশৰ বিভিন্ন ৰাজ্যৰ কৰ্মচাৰীসকলৰ এমাহৰ দৰমহাৰ কিছু অংশ কৰ্তনৰ সিদ্ধান্ত গ্ৰহণ কৰিছে ৰাজ্য চৰকাৰে তেনে সময়তে স্বাভাৱিকতে প্ৰশ্নৰ উদয় হয় যে ‘এনে এক দুৰৱস্থাৰ মাজত ৰাজ্য চৰকাৰৰ কৰ্মচাৰীয়ে লাভ কৰিব নে এপ্ৰিল মাহৰ সম্পূৰ্ণ দৰমহা?
এই আশংকা দূৰ কৰি বিত্ত মন্ত্ৰী ড০ হিমন্ত বিশ্ব শৰ্মাই জনায় যে মে’ মাহৰ দৰমহা কৰ্তন কৰা নহয় ৰাজ্য চৰকাৰৰ অধীনত কৰ্মৰত কৰ্মচাৰীসকলৰ।
‘অসমত এই দুৰৱস্থাৰ মাজতো ৰাজ্য চৰকাৰৰ অধীনৰ কৰ্মচাৰীসকলক সম্পূৰ্ণ দৰমহা দিয়াৰ সিদ্ধান্ত গ্ৰহণ কৰা হৈছে।‘ সংবাদমেলত মন্ত্ৰী হিমন্ত বিশ্ব শৰ্মাই এইদৰে কয়।
অৱশ্যে এইবাৰ ১ এপ্ৰিলৰ পৰিৱৰ্তে ৮ এপ্ৰিলতহে ৰাজ্য চৰকাৰৰ কৰ্মচাৰীসকলৰ দৰমহা দিয়াৰ সিদ্ধান্ত গ্ৰহণ কৰা বুলি মন্ত্ৰীগৰাকীয়ে সংবাদমেলত কয়।
ইপিনে, অসম চৰকাৰে সম্পূৰ্ণ দৰমহা দিয়াৰ সিদ্ধান্ত লৈছে যদিও অন্য ৰাজ্যসমূহত মন্ত্ৰী বিধায়কৰ পৰা চতুৰ্থ বৰ্গৰ কৰ্মচাৰীলৈকে দৰমহা কৰ্তন কৰা বুলি তেওঁ কয়।
তেওঁ উদাহৰণ দি কয় ‘মহাৰাষ্ট্ৰ চৰকাৰে মন্ত্ৰী বিধায়কৰ দৰমহা মাৰ্চ মাহত ৬০ শতাংশ কৰ্তন কৰিছে। চৰকাৰী বিষয়াৰ ৫০ শতাংশ আৰু তৃতীয় বৰ্গৰ কৰ্মচাৰীৰ ২৫ শতাংশ দৰমহা কৰ্তন কৰিছে। চতুৰ্থ বৰ্গৰ কোনো কৰ্তন কৰা নাই। তেলেংগনাত প্ৰশাসনিক বিষয়াৰ দৰমহা ৬০ শতাংশ কৰ্তন কৰিছে। সাধাৰণ কৰ্মচাৰীৰ দৰমহা কৰ্তন কৰিছে প্ৰায় ৫০ শতাংশ। চতুৰ্থ বৰ্গৰ কৰ্মচাৰীৰ ৩০ শতাংশ দৰমহা কৰ্তন কৰা হৈছে। উৰিষ্যাত প্ৰশাসনিক বিষয়াসকলৰ দৰমহা ৫০ শতাংশ কৰ্তন কৰা হৈছে। অন্ধ্ৰপ্ৰদেশত প্ৰথম বৰ্গৰ ৬০ শতাংশ, দ্বিতীয় তৃতীয় বৰ্গৰ ৫০ শতাংশ আৰু চতুৰ্থ বৰ্গৰ ১০ শতাংশকৈ দৰমহা কৰ্তন কৰিছে। কেৰেলাত প্ৰতি মাহত ৬ দিনৰ দৰমহা কৰ্তন কৰাৰ সিদ্ধান্ত লৈছে। কৰ্ণাটক, মধ্যপ্ৰদেশ, বিহাৰতো কৰ্তন কৰিছে।‘
অৱশ্যে অসমতো সকলো বিভাগৰ ব’ৰ্ডৰ অধ্যক্ষ আৰু উপাধ্যক্ষৰ পৰাও দৰমহাৰ ২৫ শতাংশ ১ মে’ৰ পৰা কৰ্তন কৰাৰ সিদ্ধান্ত লৈছে বুলি তেওঁ জানিবলৈ দিয়ে।
আনহাতে, কোভিডে স্বাস্থ্যৰ লগতে অৰ্থনীতিৰ ওপৰত ডাঙৰ আঘাত হানিছে বুলি স্বীকাৰ কৰি অসমৰ অৰ্থনীতি কি দিশে গতি কৰিছে তাৰে এক সম্যক আভাস দিয়ে মন্ত্ৰীগৰাকীয়ে।
‘এপ্ৰিল ২০১৯ ত এছজিএছটিত সংগ্ৰহ হৈছিল ৪০৬ কোটি টকা। চিজিএছটিত সংগ্ৰহ হৈছিল ২৭৬ কোটি টকা আৰু আইজিএছটি ১৯৩ কোটি টকা। কিন্তু ২০২০ চনৰ এপ্ৰিলত মাত্ৰ ৬৮ কোটি টকা, যোৱাৰ বৰ্ষতকৈ ৩৩৮ কোটি টকা কৰ কমকৈ সংগ্ৰহ হ’ল। এই মাহত চি.জি.এছটিত সংগ্ৰহ হ’ল ৬০ কোটি টকা। আইজিএছটিত সংগ্ৰহ হ’ল ৬২ কোটি টকা।‘ মন্ত্ৰীগৰাকীয়ে সংবাদমেলত এইদৰে কয়।
মুঠ জিএছটি সংগ্ৰহৰ এক তুলনা কৰি মন্ত্ৰীগৰাকীয়ে কয় ‘২০১৯ত ৯৩২.৩৬ কোটি টকা জিএছটি সংগ্ৰহ হৈছিল। এই বৰ্ষত মাত্ৰ ১৯৩ কোটি টকা সংগ্ৰহ হৈছে। ৮০ শতাংশ কম হৈছে জিএছটি সংগ্ৰহ।‘
ইয়াৰোপৰি তেওঁ কয় ‘২০১৯ ৰ এপ্ৰিলত পেট্ৰ’লজাত সামগ্ৰীৰ পৰা ৩৪০ কোটি টকা সংগ্ৰহ কৰিছিল এইবছৰ ৬০ কোটি টকাৰো এতিয়ালৈকে ওচৰ চাপিব পৰা নাই।‘
আনহাতে, কেবিনেটৰ অনুমোদন ক্ৰমে বিত্ত বিভাগে কেতবোৰ সিদ্ধান্ত লৈছে বুলি উল্লেখ কৰি মন্ত্ৰীগৰাকীয়ে কয় ‘বিত্ত বিভাগৰ অনুমোদন নোলোৱাকৈ প্ৰশাসনীয় বিভাগসমূহে কোনো আচঁনি গ্ৰহণ নকৰিব। কেন্দ্ৰীয় চৰকাৰৰ পৰা অহা যোজনা বা বৈদেশিক বিষয়ৰ আঁচনি চলাই যাব পাৰিব। দা-দৰমহাৰ উপৰিও অতিৰিক্ত খৰচ এতিয়া কাৰ্যালয়মূহে ২৫ শতাংশ খৰচৰ অনুমতিৰ পৰিৱৰ্তে ১০ শতাংশহে অনুমতি লাভ কৰিব।
‘মুখ্য মন্ত্ৰীৰ প্ৰত্যক্ষ অনুমোদন অবিহনে ৰাজ্য চৰকাৰে কোনো বাহন ক্ৰয় কৰিব নোৱাৰিব। প্ৰথম চাৰিমাহত ৰাজ্য চৰকাৰে ৱৰ্কশ্বপ, চেমিনাৰ আদি অনুষ্ঠিত নকৰে। প্ৰয়োজনত ভিডিঅ’ কনফাৰেন্সিঙৰ জৰিয়তে এয়া সম্পন্ন হ’ব। মুখ্য ন্যায়াধীশ, মুখ্যমন্ত্ৰী, মুখ্য সচিবক বাদ কৰি অন্য কোনেও একজিউকেটিভ ক্লাছত যাত্ৰা কৰিব নোৱাৰিব। ৰাজ্য চৰকাৰৰ কোনো বিষয়া বৈদেশিক ভ্ৰমণত যাব নোৱাৰিব। ৰাজহুৱা স্বাৰ্থত যাবলগীয়া হ’লে তেওঁৰ অনুমতি থাকিব।‘ মন্ত্ৰীগৰাকীয়ে কয়।
ইয়াৰোপৰি বিধায়ক পুঁজিৰ বাবে চাৰিটা মাহ কোনোধৰণৰ ধনৰ আবন্টন নহয় বুলি তেওঁ সদৰী কৰি লগতে কয় ‘অৱশ্যে জিলা উপায়ুক্তলৈ ইতিমধ্য মুকলি কৰি দিয়া ধনসমূহ উন্নয়নৰ কামত খৰচ কৰিব পাৰিব।‘
