ৰিলায়েন্স জিঅ’ই বৃহস্পতিবাৰে ২০১৯-২০ বিত্তীয় বৰ্ষৰ চতুৰ্থ কোৱাৰ্টাৰৰ আয়ৰ প্ৰতিবেদন প্ৰকাশ কৰিছে। টেলিকম সংস্থাটোৱে জানিবলৈ দিয়া মতে এই কোৱাৰ্টাৰত ২৪ মিলিয়ন নতুন ছাৱস্ক্ৰাইবাৰ সংযোগ ঘটাবলৈ সক্ষম হৈছে।
ৰিলায়েন্স জিঅ’ই কোভিড-১৯ৰ বাবে চলি থকা লকডাউনৰ সময়ছোৱাত সংযোগৰ ক্ষেত্ৰত এক গুৰুত্বপূৰ্ণ বৃদ্ধি ঘটাবলৈ সক্ষম হোৱা বুলি উল্লেখ কৰিছে।
কোম্পানীটোৱে লগতে ভাৰতীয় ব্যৱহাৰকাৰীসকলৰ (য়ুজাৰ) বাবে এক নতুন JioMeet ভিডিঅ’ কনফাৰেন্সিঙ প্লেটফৰ্মৰ ঘোষণাও কৰে।
কোম্পানীটোৱে ব্যৱহাৰকাৰীৰ ৰাজহকে ধৰি ইয়াৰ অপাৰেশ্যনৰ পৰাই অকল ১৪,৮৩৫কোটি টকাৰ ৰাজহ আহৰণ কৰিছে।
ৰিলায়েন্স জিঅ’ই সদৰী কৰিছে যে উক্ত কোৱাৰ্টাৰৰ সময়ছোৱাত ইয়াৰ মুঠ ৱায়াৰলেছ ডাটা ট্ৰেফিক হৈছে ১,২৮৪কোটি জিবি।সেইদৰে এই সময়ছোৱাত মুঠ ভইচ ট্ৰেফিক হৈছে ৮৭,৬৩৪কোটি মিনিট।
প্ৰতি মাহে প্ৰতিজন য়ুজাৰৰ গড় ডাটা ব্যৱহাৰ আছিল ১১.৩ জিবি আৰু গড় ভইচ কলৰ ব্যৱহাৰ প্ৰতিজন য়ুজাৰৰ বিপৰীতে ৭৭১মিনিট।
কোম্পানীটোৰ খতিয়ান দাঙি ধৰি ৰিলায়েন্স ইণ্ডাষ্ট্ৰীজ লিমিটেডৰ অধ্যক্ষ তথা পৰিচালন সঞ্চালক মুকেশ আম্বানিয়ে কয়,’’ আমি এই কঠিন সময়ছোৱাত আমাৰ গ্ৰাহকসকলৰ বাবে সংযোগ তথা অপাৰেশ্যন সহজতৰ কৰি তুলিবলৈ পাই আনন্দিত হৈছো। প্ৰতিজন জিঅ’ৰ কৰ্মচাৰীয়ে গ্ৰাহকেই প্ৰথম বুলি ভাৱিবলৈ শিকিছে আৰু ইয়াৰ ফলশ্ৰুতিতে আমি গ্ৰাহকৰ পৰা সঁহাৰি লাভ কৰি বৰ্তমান প্ৰায় ৪০ কোটি ভাৰতীয়ক সেৱা আগবঢ়াইছো। জিঅ’ই ভাৰতত ডিজিটেল বিপ্লৱৰ নেতৃত্ব অব্যাহত ৰাখিব আৰু আমাৰ সেৱাৰ আন্তৰিক গ্ৰহণযোগ্যতাই আমাক প্ৰতিদিনে উন্নত সেৱাৰ বাবে উৎসাহিত কৰিব।‘’
উল্লেখযোগ্য যে জিঅ’ই ইয়াৰ বিকাশৰ ধাৰা অব্যাহত ৰাখি শেহতীয়াকৈ বিশ্বৰ বৃহত্তম ডিজিটেল কোম্পানী ফেচবুকৰ সৈতে এক পাৰ্টনাৰশ্বিপত আৱদ্ধ হৈছে।
আম্বানিয়ে কয়,‘’আমাৰ দৃষ্টি আছে ভাৰতৰ ৬০ মিলিয়ন ক্ষুদ্ৰ, সৰু আৰু মজলীয়া ব্যৱসায়, ১২০ মিলিয়ন কৃষক, ৩০ মিলিয়ন ক্ষুদ্ৰ ব্যৱসায়ী আৰু নিযুত সংখ্যক অসংগঠিত খণ্ডৰ ক্ষুদ্ৰ আৰু মজলীয়া উদ্যোগীসকলৰ ওপৰত।‘’
৪৩,৫৭৪ কোটি টকাৰে জিঅ’ প্লেটফৰ্মৰ ৯.৯৯% শ্বেয়াৰ ফেচবুকে গ্ৰহম কৰাৰ পাছতেই ৰিলায়েন্স জিঅ’ৰ এই আয়ৰ প্ৰতিবেদন প্ৰকাশ পাইছে।
