কেন্দ্ৰীয় চৰকাৰে তৃতীয় পৰ্যায়ৰ লকডাউন বহু পৰিমানে শিথিল কৰাৰ পিছৰ দিনটোতে ক’ৰ’না ভাইৰাছে সংহাৰী ৰূপ ধাৰণ কৰিছে ভাৰতৰ বিভিন্ন প্ৰান্তত।
পূৰ্বৰ সকলো ৰেকৰ্ড ভংগ কৰি দেশত যোৱা ২৪ ঘণ্টাত ক’ৰ’না আক্ৰান্ত ১৯৫ গৰাকী লোকৰ মৃত্যু হোৱাৰ বিপৰীতে নতুনকৈ ৩৯০০ গৰাকী লোক আক্ৰান্ত হৈছে।
দেশত এই পৰ্যন্ত ৪৬৪৩৩ গৰাকী লোক ক’ৰ’নাত আক্ৰান্ত হৈছে আৰু মৃত্যু হোৱা লোকৰ সংখ্যা হৈছে ১৫৬৮। আনহাতে ১২ হাজাৰ ৭২৮ গৰাকী লোক সুস্থ হৈ উঠিছে।
উল্লেখ্য যে মে’ মাহৰ এই পাঁচদিনত দ্ৰুতগতিত বৃদ্ধি পাবলৈ ধৰিছে ক’ৰ’না সংক্ৰমণৰ ঘটনা। ৩০ এপ্ৰিললৈকে ক’ৰ’নাৰ ফলত মৃত্যু হোৱা লোকৰ সংখ্যা আছিল ১০৭৫, কিন্তু যোৱা চাৰিদিনত এই সংখ্যা ১৫শ (৫০০ৰো অধিক) অতিক্ৰম কৰিলে।
দেশৰ ভিতৰতে মহাৰাষ্ট্ৰত সৰ্বাধিক ১৪ হাজাৰ ৫৪১ গৰাকী লোক ক’ৰ’নাত আক্ৰান্ত হৈছে আৰু ইয়াৰে ৫৮৩ গৰাকী লোকৰ ইতিমধ্যে মৃত্যু ঘটিছে।
আনহাতে আক্ৰান্তৰ সংখ্যা দ্ৰুত গতিত বৃদ্ধি পাবলৈ ধৰিছে গুজৰাটত। গুজৰাটত এতিয়ালৈকে ৫ হাজাৰ লোক আক্ৰান্ত হোৱাৰ বিপৰীতে মৃত্যু হৈছে ৩১৯ গৰাকী লোকৰ।
দেশৰ স্বাস্থ্য মন্ত্ৰ্যালয়ে জাৰি কৰা এই তথ্যই এতিয়া সকলোকে চিন্তিত কৰি তোলাৰ লগতে ভাৰত এক ভয়াৱহ ভৱিষ্যতৰ দিশত আগবাঢ়িছে নেকি বুলি প্ৰশ্ন উত্থাপন হৈছে।
