অৱশেষত গ্ৰেপ্তাৰ হ’ল প্ৰায়ে ফে’চবুকত বিতৰ্কিত মন্তব্য দি অহা মঙলদৈ মহাবিদ্যালয়ৰ ইংৰাজী বিভাগৰ প্ৰবক্তা ৰূপাৰাণী ভূঞা।
প্ৰবক্তা গৰাকীক আজি মঙলদৈ আৰক্ষীয়ে কৰ্তব্যৰত আৰক্ষীক কামত বাধা দিয়া আৰু দুৰ্ব্যৱহাৰ কৰাৰ অভিযোগত গ্ৰেপ্তাৰ কৰে।
উল্লেখযোগ্য যে বিভিন্ন সময়ত ফে’চবুকত সাম্প্ৰদায়িক মন্তব্য দি অহা ৰূপাৰাণী ভূঞাই কিছুদিন পূৰ্বে কিংবদন্তি সাহিত্যিক চৈয়দ আব্দুল মালিকৰ সন্দৰ্ভত ফে’চবুকত বিতৰ্কিত প’ষ্ট দিছিল।
উক্ত প’ষ্টৰ বাবে বহুকেইটা সংগঠনে দাখিল কৰা এজাহাৰৰ ভিত্তিত তেওঁৰ বিৰুদ্ধে মঙলদৈ থানাত ৰুজু হৈ আছে তিনিটাকৈ গোচৰ।
উক্ত গোচৰ কেইটা সম্দৰ্ভত সোধা-পোচাৰ ভূঞাক মঙলদৈ আৰক্ষী থানাৰ মহিলা কোষৰ উপ পৰিদৰ্শক টুইংকল গোস্বামীৰ আগত হাজিৰ হ’বলৈ কোৱা হৈছিল।
কিন্তু তদন্তত আৰক্ষী বিষয়া গৰাকীক সহযোগ কৰাৰ বিপৰীতে প্ৰবক্তা গৰাকীয়ে তেওঁক দুৰ্ব্যৱহাৰ কৰি এক উচ্ছৃংখল পৰিৱেশহে সৃষ্টি কৰে বুলি মঙলদৈ থানাৰ ভাৰপ্ৰাপ্ত বিষয়া নিৰঞ্জন বৰুৱাই জনায়।
পিছত উপ পৰিদৰ্শক গোস্বামীৰ এখন এজাহাৰৰ ভিত্তিত ৰূপাৰাণী ভূঞাৰ বিৰুদ্ধে ভাৰতীয় দণ্ডবিধিৰ ৩৫৩/২৯৪ আৰু ৫০৬ ধাৰাৰ অধীনত ২৬৪/২০২০ নম্বৰৰ এক গোচৰ কৰা হয়।
ইয়াৰ পিছতে প্ৰবক্তা গৰাকীক গ্ৰেপ্তাৰ কৰি ন্যায়িক জিম্মালৈ লৈ যোৱা হয় বুলি নিৰঞ্জন বৰুৱাই জানিবলৈ দিয়ে।
বৰুৱাই জনোৱা মতে মঙলদৈ আৰক্ষী থানাত ভূঞাৰ বিৰুদ্ধে ইতিপূৰ্বে তথ্য প্ৰযুক্তি আইন(IT act)ৰ অধীনত ২২৫/২০২০, ২৩৬/২০২০ আৰু ২৪১/২০২০ নম্বৰৰ তিনিটা গোচৰ ৰুজু হৈ আছে।
লগতে পঢ়ক প্ৰয়াত কবি চৈয়দ আব্দুল মালিকক মোগলৰ প্ৰেমিক সজোৱা ৰূপা ৰাণী ভূঞাৰ বিৰুদ্ধে গোচৰ
