হায়দৰাবাদত এটা ইটাভাটাত কৰ্ম সংস্থাপন হেৰুৱাই বিমোৰত পৰিছে নগাঁৱৰ ৫ জন যুৱক।
ইয়াভাটাটোত শ্ৰমিক হিচাপে কৰ্মৰত আছিল যুৱককেইজন।
কিন্তু ল’কডাউনৰ ফলত ইটাভাটাৰ কাম-কাজ বন্ধ হৈ যোৱাৰ ফলত এতিয়া প্ৰায় কৰ্ম সংস্থাপন হেৰুওৱাৰ দৰে অৱস্থা হ’ল যুৱককেইজনৰ।
বৰ্তমান ইটাভাটাৰ মালিকেও যুৱককেইজনৰ দায়িত্ব ল’বলৈ অস্বীকাৰ কৰিছে।
যাৰ ফলত এতিয়া চৰম বিপদৰ সন্মুখীন হৈছে যুৱককেইজন।
যুৱককেইজন হৈছে ক্ৰমে নিপু আলি (কুঁৱৰীটোল চাৰিআলি, কলিয়াবৰ, নগাঁও জিলা), চামিম আফতাৰ (লাঙিচুক, কলিয়াবৰ, নগাঁও জিলা), আজিদ আলি (লাঙিচুক, কলিয়াবৰ, নগাওঁ জিলা), ফয়দুল আলি (লাঙিচুক, কলিয়াবৰ, নগাঁও জিলা) আৰু আমিনুল আলি (কাঠপাৰা, নগাঁও জিলা)।
ল’কডাউনৰ সময়ছোৱাত এসাজ খাই এসাজ লঘোণে থাকিবলগীয়া হৈছে যুৱককেইজন।
ল’কডাউনৰ সময়ছোৱাত নিজৰ মজুৰি লাভৰ পৰা বঞ্চিত হৈ আছে যুৱককেইজন।
তাৎপৰ্যপূৰ্ণ ভাৱে ৰাজ্য চৰকাৰৰ বিত্ত বিভাগে অসম কেয়াৰ আঁচনিৰ অধীনত বহিঃৰাজ্যত আৱদ্ধ হৈ থকা শ্ৰমিক, ছাত্ৰ-ছাত্ৰী বা তীৰ্থযাত্ৰীসকলক প্ৰতিমাহে ২ হাজাৰ টকাকৈ আৰ্থিক অনুদান আগবঢ়োৱাৰ কথা ঘোষণা কৰিছিল যদিও পাঁচোজন যুৱকে এতিয়াও লাভ কৰা নাই কোনো সাহায্য।
তেওঁলোকে বাৰম্বাৰ ৰাজ্য চৰকাৰে নিৰ্ধাৰণ কৰি দিয়া নম্বৰত মিছডকল দি আছে আৰু প-পত্ৰ পূৰণ কৰি প্ৰেৰণ কৰি আছে যদিও তেওঁলোকৰ এজনৰো একাউন্টত এতিয়ালৈকে ধনৰাশি জমা হোৱা নাই।
ইপিনে, ঘৰৰ অৱস্থা একেবাৰে দুৰ্বল বাবে পৰিয়ালৰ লোকেও কোনোধৰণৰ সহায় কৰিব পৰা নাই যুৱককেইজনক।
সেয়েহে তেওঁলোকৰ সমগ্ৰ দুখ-দুৰ্দশা বিৱৰি আজি দুপৰীয়া এক ফেইচবুক লাইভ কৰে যুৱককেইজনে।
উক্ত ফেইচবুক লাইভৰ জৰিয়তে তেওঁলোকে ৰাজ্য চৰকাৰৰ মুখ্যমন্ত্ৰী সৰ্বানন্দ সোণোৱাল আৰু স্বাস্থ্য মন্ত্ৰী ড০ হিমন্ত বিশ্ব শর্মাক অসমলৈ ঘূৰাই নিবৰ বাবে সুবিধা কৰি দিবলৈ কাতৰ অনুৰোধ জনায়।
ইয়াৰোপৰি, হায়দৰাবাদৰ পচমপলীত আৱদ্ধ হৈ থকা যুৱককেইজনে ইচ্ছুক ব্যক্তিক সহায়ৰ বাবে 9101461301 নম্বৰত যোগাযোগ কৰিবলৈ আহ্বান জনায়।
https://m.facebook.com/story.php?story_fbid=679348292826120&id=100022528653094