নগাঁও জিলাৰ চামগুৰি আৰু পুৰণিগুদামৰ বিভিন্ন অঞ্চলত ল’কডাউন আৰু সান্ধ্য আইনকো নেওচি একাংশ লোকে চুলাই মদৰ ৰমৰমীয়া বেহা অব্যাহত ৰাখিছে।
এইসকল অবৈধ চুলাই মদৰ বেপাৰীৰ ওপৰত আজি পৰ্যন্ত আবকাৰী বিভাগে কোনো ধৰণৰ বিশেষ ব্যৱস্থা গ্ৰহণ কৰা নায়।
বিশেষকৈ নগাঁৱৰ চামগুৰি ৰাজহ চক্ৰ বিষয়া কাৰ্যলয়ৰ অন্তৰ্গত ধনতোলা আৰু চকৰিপাম অঞ্চলৰ পৰা বিভিন্ন জনে চুলাই মদ সৰবৰাহ কৰি চলচলী জলাহগাঁৱৰ ননৈ নৈৰ পাৰত ব্যৱসায় চলাই আছিল।
আজি এক গোপন সূত্ৰৰ পম খেদি পুৰণিগুদাম আৰক্ষী চকীৰ ভাৰপ্ৰাপ্ত আৰক্ষী বিষয়া বিৰদাও গোৱাৰীৰ নেতৃত্বত যোৱা পুৰণিগুদাম আৰক্ষীৰ পহৰা চৰীৰ এটা দলে অতৰ্কিতে ধনতোলাৰ জুৰা মুৰাৰ বাসগৃহত অভিযান চলাই বহু পৰিমাণৰ চুলাই মদ ধ্বংস কৰে।
অভিযানৰ উমান লাভ কৰি চুলাই ব্যৱসায়ী জুৰা মুৰাই পলায়ন কৰে যদিও আৰক্ষীয়ে চুলাইৰ লগতে চুলাই প্ৰস্তুত কৰা সকলো সামগ্ৰী ধ্বংস কৰে।
আনহাতে, চলচলী জলাহগাঁৱৰ ন’নৈৰ পাৰত একাংশ অসাধু লোকে চলোৱা চুলাই ব্যৱসায়ৰ লগতে অঞ্চলটোৰ বিভিন্ন স্থানত চলি থকা এনেধৰণৰ অনৈতিক কাৰ্যকলাপৰ ওপৰত আৰক্ষীৰ অভিযান অব্যাহত থাকিব বুলি সংবাদ মাধ্যমক আৰক্ষী বিষয়া গৰাকীয়ে জানিবলৈ দিয়ে।
