কৰ’না আক্ৰান্ত ৰোগীৰ সংখ্যাৰ ক্ষেত্ৰত দেশৰ শীৰ্ষত থকা ৰাজ্যসমূহৰ ভিতৰত তামিলনাডু অন্যতম। এইখন ৰাজ্যতে ঘটিছে এক ভয়ংকৰ কাণ্ড।
ৰাজ্যখনৰ এখন শাক-পাচলিৰ পাইকাৰী বজাৰৰ পৰাই ২,৬০০ জন লোক কৰ’না ভাইৰাছৰ দ্বাৰা সংক্ৰমিত হৈছে।
চেন্নাইৰ কোয়েমবেদু পাইকাৰী বজাৰলৈ অহাযোৱা কৰা লোকৰ সৈতে যিকোনো ধৰণে সংস্পৰ্শলৈ অহা সকলোকে পৰীক্ষা কৰা হৈছে।
স্বাভাৱিকতে আক্ৰান্তৰ সংখ্যা আৰু বৃদ্ধি পোৱাৰ আশংকা কৰা হৈছে।
হটস্পট হিচাপে চিনাক্ত কৰা বজাৰখনত প্ৰয়োজনীয় ব্যৱস্থা গ্ৰহণ কৰা হৈছে।
দেশজুৰি চলি লকডাউনৰ মাজতে বিভিন্ন বজাৰত মানুহৰ ভিৰ উদ্বেগজনক বিষয় হৈ পৰিছে। তামিলনাডুতো একেই দৃশ্য পৰিলক্ষিত হৈছে।
মানুহক বুজাই লাভ নোহোৱাৰ পাছত বাধ্য হৈ প্ৰশাসনে বহুকেইখন বজাৰ বন্ধ কৰি দিছে।
দেশত লকডাউন লাহে লাহে শিথিল কৰি দিয়াৰ সময়তে কোয়েমবেদু বজাৰৰ ঘটনাই স্বাভাৱিকতে আতংক বৃদ্ধি কৰিছে।
বাতৰি অনুসৰি, বজাৰখনলৈ অহা লোকৰ সৈতে প্ৰত্যক্ষ বা পৰোক্ষভাৱে সম্পৰ্কিত বহুলোকৰ পৰীক্ষা কৰা হৈছে যাৰ বাবে এনে বৃহৎ সংখ্যাত সংক্ৰমণ ধৰা পৰিছে।
কোয়েমবেদু বজাৰৰ ঘটনাৰ পাছতে দিল্লীক চেৰ পেলাই কৰ’না আক্ৰান্তৰ সংখ্যাৰ ক্ষেত্ৰত তামিলনাডু দেশৰ ৰাজ্যসমূহৰ ভিতৰত তৃতীয় স্থানলৈ উঠিল।
বৃহস্পতিবাৰে ৰাজ্যখনত মুঠ আক্ৰান্তৰ সংখ্যা ৯২২৭জনলৈ বৃদ্ধি পাইছে।
ৰাজ্যখনত মুঠ ৬৪জন লোকে প্ৰাণ হেৰুৱাইছে আৰু ২১৭৬জন লোক সুস্থ হৈ উঠিছে।
