হাফলং কোভিড কেয়াৰ চেন্টাৰৰ কেঞ্চাৰ আক্ৰান্তৰ স্বা’ৱ চেম্পল পৰীক্ষাৰ ৰিপ’ৰ্ট নিগেটিভ অহাৰ খবৰত স্বস্তিৰ বাৰ্তা কঢ়িয়াই আনিছে চিকিৎসা কৰ্মীৰ উপৰি জিলাখনৰ সাধাৰণ ৰাইজৰ মাজত।
বুধবাৰে নিশা প্ৰায় ৯ মান বজাত শিলচৰ মেডিকেল কলেজ হাস্পাতালৰ পৰা মেইল অহাৰ পাছত কৰ্তৃপক্ষ এই বিষয়ে নিশ্চিত হয়।
জিলা তথ্য আৰু জনসংযোগ বিষয়া পূৰবী ফংলুয়ে চৰকাৰী ভাৱে এই কথা ঘোষণা কৰে।
উল্লেখ্য যে ৰাজ্য জুৰি ক’ৰ’না আক্ৰান্তৰ সংখ্যা অতিকৈ বৃদ্ধি পোৱাত পাৰ্বত্য জিলাৰ সাধাৰণ ৰাইজো শংকতি হোৱা পৰিলক্ষিত হৈছে।
বিশেষকৈ প্ৰতিবেশী জিলা কাছাৰ, হোজাইকে ধৰি শেহতীয়াকৈ পাৰ্বত্য জিলা কাৰ্বি আংলংৰ এগৰাকী ব্যক্তিৰ শৰীৰত কোভিড১৯ পজিটিভ ধৰা পৰাত স্বাস্থ্য কৰ্মী সকলৰ মাজত উৎকণ্ঠাই বিৰাজ কৰিছিল।
কিছু দিন আগত হাফলংৰ কাশীপুৰ গাঁৱৰ কেঞ্চাৰ আক্ৰান্ত এগৰাকী ব্যক্তি গুৱাহাটীৰ নৰ্থ ইষ্ট কেঞ্চাৰ হাস্পাতালত চিকিৎসা সামৰি হাফলং উভতি অহাৰ পাছত ব্যক্তি গৰাকীক কোৱাৰেন্টাইন কৰা হৈছিল।
চেন্টাৰত তেওঁৰ স্বাস্থ্যৰ দ্ৰুত অৱনতি ঘটে। অৰ্থাৎ উচ্চ তাপমাত্ৰাত জ্বৰ হোৱাৰ উপৰি বমি আৰু ডায়েৰিয়া হয়।
লগে লগে হাফলং কোভিড কেয়াৰ চেন্টাৰলৈ ৰোগী গৰাকীক স্থানান্তৰ কৰি আইচ’লেছনত ৰখা হয়।
লোকজনৰ স্বা’ৱ চেম্পল পৰীক্ষাৰ বাবে শিলচৰত পঠিওৱা হয়। এই খবৰ বিয়পি পৰাৰ পাছত ৰাইজৰ মাজত হোৱা ধোৱা লাগে।
অবশ্যে যোৱা কালি ৰিপ’ৰ্ট নিগেটিভ অহাত আতঙ্কৰ অন্ত পৰে।
ইফালে হাফলংৰ বিভিন্ন ঠাইত বহিঃৰাজ্য ক্ৰমে নতুন দিল্লী, নিউ জলপাইগুৰি, চেন্নাই আৰু কাটিহাৰৰ পৰা অহা প্ৰায় ষাঠিৰ অধিক ব্যক্তিক ইনষ্টিটিউশ্যনাল কোৱাৰেন্টাইন কৰা হৈছে।
ইতিমধ্যে ৩১ গৰাকী ব্যক্তিৰ স্বা’ৱ চেম্পল পৰীক্ষাৰ ৰিপ’ৰ্ট নিগেটিভ আহিছে।
