কালি গুৱাহাটীৰ ৰুক্মিনীগাঁও কন্টেনমেন্ট জ’নৰ মিতালী গগৈ দত্ত নামৰ এগৰাকী মহিলাই ফেচবুকত এটা পোষ্ট কৰিছিল। যাৰ জৰিয়তে তেওঁলোকৰ যোৱা ৫ দিনৰ অৱস্থাসমূহ দাঙি ধৰিছিল।
যোৱা ১৬ তাৰিখৰ পৰা ৰূক্মিনীগাঁও কন্টেইনমেন্ট জ’ন হৈ আছে। সেই অঞ্চলৰ ৰাইজে প্ৰশাসনে নিৰ্ধাৰণ কৰি দিয়া নিয়ম মানি ভিতৰতে সোমাই আছে। কিন্তু পাঁচ দিন ধৰি সেই মানুহখিনিৰ খবৰলোৱা নাছিল কামৰূপ মহানগৰ জিলা প্ৰশাসনে।
তেওঁলোকে কিবা অত্যাৱশ্যকীয় সামগ্ৰীৰ অসুবিধাত ভুগিছে নেকি, তাত থকা লোকসকলৰ কিবা পৰীক্ষা কৰোৱা হ’ব নেকি ইত্যাদি কোনো খবৰ লোৱা নাছিল কামৰূপ মহানগৰ জিলা প্ৰশাসনে।
ঠিক সেইদৰে গুৱাহাটী পৌৰ নিগমেও উক্ত অঞ্চলৰ পৰা পাঁচদিন ধৰি জাৱৰসমূহ নিয়াৰ ব্যৱস্থা কৰা নাছিল। তেওঁলোকৰ পেলনীয়া জাৱৰ-জোথৰ সমূহে দ’ম বান্ধিছিল।
ইপিনে কালিৰ দিনটোৰ বৰষুণত সেই স্থানত পানী জমা হৈছিল। যাৰ বাবে এই অঞ্চলৰ বাসিন্দাই বাহিৰলৈ ওলাই আহি পোষ্টাৰিং কৰি প্ৰশাসনক আহ্বান জনাবলগীয়া হৈছিল তথা ফেচবুকত পোষ্ট দিবলগীয়া হৈছিল।
তাৰ পাছত আজি ৬ নম্বৰ দিনত প্ৰশাসনৰ গা লৰিল। আজি পুৱাৰ ভাগত প্ৰশাসনৰ লোক কন্টেইমেন্ট জ’নত উপস্থিত হয় আৰু পদক্ষেপ গ্ৰহণ কৰে।
ইপিনে, কালি নিশাই দিচপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া ৰুক্মিনীগাওঁৰ কন্টেইনমেন্ট জ’নত উপস্থিত হৈ অত্যাৱশ্যকীয় সামগ্ৰী যোগান ধৰে।
আজি পুৱাৰ ভাগত অঞ্চলটোৰ লোকসকলক খাদ্য সামগ্ৰী, শাক-পাছলিৰ যোগান ধৰে প্ৰশাসনে তথা সমগ্ৰ কন্টেইনমেন্ট জ’নটো চেনিটাইজ কৰাৰ ব্যৱস্থা কৰে।
ইয়াৰোপৰি, আজি পুৱাৰ ভাগত আৰক্ষী বিষয়া, ৰাজহ চক্ৰ বিষয়া আৰু প্ৰশাসনৰ অন্য লোক উপস্থিত হৈ কন্টেইনমেন্ট জ’নত থকা আৱাসীসকলক কি কি নীতি-নিৰ্দেশনা মানি চলিব লাগিব সেয়া বহলাই বাখ্যা কৰে।
লগতে তেওঁ সকলোধৰণৰ জৰুৰীকালীন যোগাযোগ নম্বৰ যোগান ধৰে প্ৰশাসনে। যিকোনোধৰণৰ সমস্যাৰ সন্মুখীন হ’লে এই জৰুৰীকালীন নম্বৰত শীঘ্ৰে যোগাযোগ কৰিবলৈ অনুৰোধ কৰে।
ইপিনে, মিতালী গগৈ দত্তই যোৱা ৫ দিনে সন্মুখীন হৈ অহা সমস্যাসমূহৰ সমাধানৰ ক্ষেত্ৰত প্ৰশাসনে ব্যৱস্থা গ্ৰহণ কৰাৰ বাবে ধন্যবাদ জ্ঞাপন কৰে। তদুপৰি তেওঁৰ ফেচবুক পোষ্টটো শ্বেয়াৰ কৰি বা ফোনযোগে খবৰ লোৱা সকলোলৈকে তেওঁ ধন্যবাদ জনায়।
