গোৱালপাৰা জিলাত ক্ৰমাৎ বৃদ্ধি পাবলৈ ধৰিছে বনৰীয়া হাতী মানুহৰ সংঘাত। জিলাখনৰ মৰণৈ থানাৰ অন্তৰ্গত লালাবড়ী বামুনবড়ীত বনৰীয়া হাতীৰ আক্ৰমণত এগৰাকী লোক নিহত হয়।
নিহত লোকজন ভক্ত প্ৰসাদ ৰায় (৪০) বুলি জানিব পৰা গৈছে।
জানিব পৰা মতে, আজি বিয়লি ৫ মান বজাত ৩০-৩৫ জনীয়া বনৰীয়া হাতীৰ এটা বৃহৎ জাকে বনাঞ্চলৰ পৰা বামুনবড়ী গাঁওখনত প্ৰৱেশ কৰি উপদ্ৰৱ চলায়।
দিনৰ পোহৰতে বনৰীয়া জাকটোক ৰাইজে খেদি পঠিয়াবলৈ চেষ্টা অব্যাহত ৰখাৰ সময়তে জাকটোৱে অতৰ্কিতে উপদদ্ৰৱ চলায় ভক্ত প্ৰসাদ ৰায়ৰ বাসগৃহত।
নিজৰ প্ৰাণৰ ভয়ত ঘৰ এৰি পলায়ন কৰোতে বনৰীয়া হাতীৰ আক্ৰমণত থিতাতে নিহত হয় লোকজন।
ইফালে গাঁওখনত বনৰীয়া হাতীৰ প্ৰৱেশ কৰাৰ সময়তে গোৱালপাৰাৰ বন বিভাগক ৰাইজে ফোনযোগে বহুবাৰ অৱগত কৰিছিল যদিও বহু পলমকৈ ঘটনাস্থলীত উপস্থিতি হোৱাত ৰাইজ ক্ষুভিত হৈ পৰে।
পাছত ঘটনাস্থলীত বন বিভাগৰ লোকৰ লগতে মৰনৈ থানাৰ আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে গোৱালপাৰা অসামৰিক চিকিৎসালয়লৈ প্ৰেৰণ কৰে.
উল্লেখ্য যে, সম্প্ৰতি হাতী-মানুহৰ সংঘাতে ভয়াৱহ ৰূপ লৈছে জিলাখনৰ বিভিন্ন প্ৰান্তত। মেঘালয়ৰ পৰা খাদ্যৰ সন্ধানত নামি অহা কেইবাটাও বনৰীয়া হাতীৰ জাকে জিলাখনৰ ৰংজুলি, দৰংগিৰি, দুধনৈ, কৃষ্ণাই, আগিয়া, শোলমাৰী, শ্ৰীসূৰ্যগিৰি, দহিকটা আদি অঞ্চলত দীৰ্ঘদিনৰ পৰা ত্ৰাসৰ সৃষ্টি কৰিছে।
ইমানৰ পিছতো জিলাখনৰ বন বিভাগে বনৰীয়া হাতীক সমূহক পুনৰ বনাঞ্চললৈ খেদি পঠিওৱাত ব্যৰ্থ হোৱা পৰিলক্ষিত হৈছে।
