দিহিং পাটকাই অভয়াৰণ্যৰ পূব সীমাত অৱস্থিত চালেকিত ৰাষ্ট্ৰীয় ব্যনপ্ৰাণী ব’ৰ্ডে হস্তীৰ বাবে সংৰক্ষিত বনাঞ্চলৰ ৯৮.৫৯ হেক্টৰ ভূমিত ক’ল ইণ্ডিয়া লিমিটেডক কয়লাৰ মুক্ত খননৰ বাবে অনুমোদন দিয়া কাৰ্য্যক বিভিন্ন দল সংগঠন আৰু সচেতন মহলে বিৰোধিতা কৰি আহিছে।
ইয়াৰ মাজতে ৰাজ্যসভাৰ নৱ নিৰ্বাচিত সাংসদ অজিত কুমাৰ ভূঞা, জ্যেষ্ঠ সাংবাদিক মনজিত মহন্ত, সমাজসেৱিকা মীৰা বৰঠাকুৰ, কংগ্ৰেছৰ মুখপাত্ৰ কমল কুমাৰ মেধিকে ধৰি বিভিন্ন দল-সংগঠন সহিতে এটা সজাতি দল দেওবাৰে চৰজমিন তদন্তৰ বাবে অঞ্চল উপস্থিত হয়।
সজাতি দলটোৰ প্ৰত্যেকেই বেজেপি নেতৃত্বাধীন চৰকাৰে ক’ৰ’না মহামাৰীৰ মাজতে লোৱা এই সিদ্ধান্তক তীব্ৰ সমালোচনা কৰে।
সাংসদ অজিত কুমাৰ ভূঞাই চৰকাৰৰ এই সিদ্ধান্তক তীব্ৰ ভাষাৰে সমালোচনা কৰি কয় যে চৰকাৰৰ এনে প্ৰকৃতিধ্বংসৰ বাবে লোৱা সিদ্ধান্তৰ ফলত জৈৱ বৈচিত্ৰৰ প্ৰতি চৰম ভাবুকি আহিব।
উল্লেখযোগ্য যে কয়লাৰ মুক্ত খননৰ বাবে অনুমোদন দিয়া চালেকি অঞ্চল দিহিং পাটকাইৰ পৰা প্ৰায় ২৫ কিলোমিটাৰ নিলগত অৱস্থিত। চালেকি প্ৰস্তাৱিত বনাঞ্চলখন পাটকাই পাহাৰৰ বুকুত লাগি আছে। অঞ্চলটোত বিগত কেইবাবছৰ ধৰি কয়লাৰ মুক্ত খনন চলি আছে।
অন্যহাতে কংগ্ৰেছ চৰকাৰৰ দিনতেই বহু ভূমি বেদখল কৰি এচাম পুঁজিপতিয়ে এই অঞ্চলত গঢ়ি তুলিছিল বৃহৎ বৃহৎ চাহ বাগান। তেতিয়াৰ পৰাই উক্ত অঞ্চলৰ এই চালেকি প্ৰস্তাৱিত বনাঞ্চল বহুতৰ বাবে সোণৰ কণী পৰা হাঁহ যেন হৈছিল।
