কেন্দ্ৰই যান-বাহন আইন ১৯৮৮ আৰু কেন্দ্ৰীয় যান-বাহন বিধি ১৯৮৯ সম্পৰ্কীয় সকলো নথি-পত্ৰৰ ম্যাদ বঢ়াই দিবলৈ লোৱা সিদ্ধান্তৰ মুকলি উলংঘনেৰে অসমৰ পৰিবহণ বিভাগে জৰিমনা ল’বলৈ আৰম্ভ কৰিছে।
পৰিলক্ষিত হৈছে যে অসম পৰিবহণ বিভাগে যান-বাহন কৰ নৱীকৰণৰ ক্ষেত্ৰত জৰিমনা আদায় ল’বলৈ আৰম্ভ কৰিছে।
বহু মালবাহী বাহনৰ মূলতঃ ট্ৰাকৰ মালিকসকলে ৩১ মাৰ্চৰ পূৰ্বে যানবাহন কৰ পৰিশোধ কৰিব পৰা নাছিল কাৰণ ২৪ মাৰ্চৰ পৰা লকডাউন ঘোষণা কৰা হৈছিল।
পৰৱৰ্তী সময়ত পথ পৰিবহণ আৰু ঘাইপথ মন্ত্ৰ্যালয়ৰ সঞ্চালক পিয়ুষ জৈনে ৩০ মাৰ্চত সকলো ৰাজ্য আৰু কেন্দ্ৰীয় শাসিত অঞ্চললৈ এক চাৰ্কুলাৰ জাৰি কৰিছিল।
চাৰ্কুলাৰখনত স্পষ্টকৈ উল্লেখ আছে যে ক’ভিড-১৯ মহামাৰীৰ বাবে যানবাহন আইন ১৯৮৮ আৰু কেন্দ্ৰীয় যানবাহন বিধি ১৯৮৯ সম্পৰ্কীয় সকলো নথিপত্ৰৰ ম্যাদ ৩০ জুনলৈকে বঢ়াই দিয়া হ’ব।
অধিসূচনাখনৰ মতে ১ ফেব্ৰুৱাৰিৰ পৰা ম্যাদ উকলি যোৱা সকলো নথিৰ বৈধতা ৩০ জুনত উকলিব, আৰু সকলো নথিপত্ৰকে ৩০ জুনলৈকে “বৈধ বুলি বিবেচনা” কৰা হ’ব।
কিন্তু, অসম পৰিবহণ বিভাগৰ বিষয়াসকলে পথ পৰিবহণ আৰু ঘাইপথ মন্ত্ৰ্যালয়ৰ অধিসূচনাখন গ্ৰহণ কৰিবলৈ অস্বীকাৰ কৰিলে, আৰু জৰিমনা ল’বলৈ আৰম্ভ কৰিলে।
“এইটো আশ্চৰ্য্যৰ কথা যে অসম পৰিবহণ বিভাগৰ বিষয়াসকলে পথ পৰিবহণ আৰু ঘাইপথ মন্ত্ৰ্যালয়ৰ অধিসূচনাখন মানিবলৈ অস্বীকাৰ কৰিলে,” জি বি চৌধুৰী হ’ল্ডিং প্ৰাইভেট লিমিটেডৰ এগৰাকী কৰ্মচাৰীয়ে কয়।
কোম্পানিটোৰ কৰ্মচাৰীগৰাকীয়ে কয় যে জৰিমনা দিয়াৰ বাহিৰে তেওঁৰ আন উপায় নাছিল কাৰণ পৰিবহণ বিভাগৰ কৰ্মচাৰীয়ে জৰিমনা দিয়াটো বাধ্যতামূলক বুলি জোৰ কৰিছিল।
“লকডাউনৰ মাজত পৰিবহণ বিভাগৰ কাৰ্য্যালয়সমূহ বন্ধ থকাৰ সময়ত কোনোবাই যানবাহন কৰ কেনেকৈ দিব পাৰে?” কৰ্মচাৰীগৰাকীয়ে কয়।
বহুবাৰ চেষ্টা কৰা সত্ত্বেও গুৱাহাটীৰ জিলা পৰিবহণ বিষয়া (এনফ’ৰ্চমেণ্ট) অৰুণ বৰাৰ সৈতে যোগাযোগ কৰিব পৰা নগ’ল কাৰণ তেওঁ তেওঁৰ ম’বাইল ফোন ৰিচিভ কৰা নাছিল।
একেদৰে, অসম পৰিবহণ বিভাগৰ আয়ুক্ত এ পি তিৱাৰীয়েও ফোন গ্ৰহণ কৰা নাছিল।
